9 yanvar 2011 16:09
İtaliya yığmasının çalışdırıcısı millimizlə oyunu şərh etdi
Bu gün Valentin Qranatkinin xatirəsinə həsr olunmuş beynəlxalq turnirdə yığmamıza məğlub olan İtaliya yığmasının baş məşqçisi Salerno Paskuale də oyunla bağlı fikirlərini dilə gətirib. Azerisport.az xəbər verir ki, qarşılaşmadan sonrakı mətbuat konfransında rəqibimizin çalışdırıcısı bunları söyləyib:
“Bizim məğlubiyyətimizin başlıca və əsas səbəbi fiziki hazırlığımızın çox zəif olmasıdı. Bununla oyunçularımı məzəmmət etmirəm. Sadəcə bunu qəbul etmək lazımdı. Dekabrın 20-dən məşq etmirdik. Həm də 1 yaş fərqinin olması da öz sözünü dedi. Məhz fiziki hazırlığın qaydasında olmaması səbəbindən biz uzun ötürməli taktikaya keçdik. Ancaq mənim futbolçularım hələ meydandan 90 dəqiqə qaçmağa hazır deyil. Buna baxmayaraq, komandamın layiqli mübarizə apardığını düşünürəm. Hər halda penaltilərlə uduzduq ki, bu da lotoreyadı. Hansı ki, heç penaltilərə də xüsusi hazırlaşmamışdıq”.
