9 yanvar 2011 12:45
“XL-da olarkən `Neftçi` üzərində qələbə mənim üçün də xüsusi əhəmiyyət daşıyırdı”
Premyer Liqanın qış fasiləsini çempion kimi başa vuran `Neftçi`nin yarımmüdafiəçisi Rəşad Abdullayev azerisport.az saytına müsahibəsində qarşıdakı Türkiyə toplanışı və `Xəzər Lənkəran`la oyun barədə fikirlərini dilə gətirib.
- Siz bilirsiniz ki, Antalyaya `Xəzər Lənkəran`la eyni reyslə yollanacaqsız?
- Bu haqda xəbərim yox idi, yaxşı ki, dediniz. Ancaq burda ciddi nəsə görmürəm. Biz ötən il növbəti tur öncəsi də Gəncədə eyni oteldə məskunlaşmışdıq. Buna görə heç bir xoşagəlməz hadisə yaşanmamışdı.
- Əgər sirr deyilsə, bu komandanın üzvləriylə elə görüşlər zamanı nə danışırsız?
- Biz heç də tez-tez söhbətləşmək imkanı əldə etmirik. Ancaq görüşsək də belə, meydanda rəqibik. Həyatda isə hamımız dostuq.
- Təyyarədə yəqin ki, yeni ildəki ilk oyununuzdan da söhbət etmiş olacaqsız...
- Həmin görüş haqda heç nə danışmarıq. Emosiyalarımızı həmin oyuna saxlayaq.
- Kamran Ağayev həmişə qeyd edir ki, `Neftçi` üzərində qələbə onlara xüsusi özünəinam hissi verir...
- Sonra da sözünü təkzib edir. Mən Ağayevi yaxşı tanıyıram və təkrar edirəm ki, o, bu haqda mənə də bəzi şeylər söyləyib, lakin yaxşı mənada. Burda ciddi nəsə yoxdu. `Xəzər Lənkəran`da çıxış edərkən `Neftçi` üzərində qələbə mənim üçün də xüsusi əhəmiyyət daşıyırdı. Bu il bizim yollarımız hələ daha bir neçə dəfə rastlaşacaq. Ümid edirəm ki, maksimum nəticə toplaya biləcəyik.
- Qarşıdakı təlim-məşq toplanışından nə gözləyirsiz?
- Qarşıda bizi çətin mövsüm gözləyir. Bu hazırlıq prosesindən də çox şey asılıdı. Odu ki, güclü hazırlaşmalıyıq. Artıq Premyer Liqanın təsnifat mərhələsinin başa çatmasına cəmi 3 tur qalıb. Həmin oyunlardan maksimum xalla ayrılmaq istəyirik.
- `Neftçi` daha çox nə üzərində işləməlidi?
- Heyətimiz komplektləşib. Fiziki kondisiyalarımızı gücləndirməyimiz lazımdı. Həmçinin bir neçə yoldaşlıq görüşündə də gücümüzü sınamalıyıq.
- Hansı mövqelərin güclənməsinə ehtiyac var?
- Bu, artıq məşqçilər korpusunun işidi. Ancaq mənim fikrimcə, elə də ciddi bir problemimiz yoxdu. Hər halda iki yeni oyunçu bizə mane olmazdı. Qarşıda çoxlu oyunlar var və heç kim də zədədən sığortalanmayıb.
- Bununla `Neftçi` çempion ola bilər?
- Məncə, bəli.
- Araz Abdullayevin İngiltərənin `Everton` klubunda əsas heyətə düşmək, orda güclənmək şanslarını necə dəyərləndirərdiz?
- Bunun üçün onda kifayət qədər potensial var. Ümumiyyətlə məncə Azərbaycanda bir sıra futbolçular istənilən çempionatda lazımı şəkildə çıxış edə bilər. Araza gəlincə, o, `Everton`da güclənməlidi.
