10 yanvar 2011 14:49
`Bakı` Starkovla müqavilə bağlaya bilmir
Latviya yığmasının baş məşqçisi Aleksandr Starkov artıq 3 gündür ki, Bakıdadı. Azerisport.az xəbər verir ki, bu müddət ərzində latviyalı mütəxəssis `Bakı` rəhbərliyi ilə görüşlər keçirib, klubun bazasında olub, komanda və Azərbaycan futbolu haqda bütün informasiyaları alıb. Lakin hələ də yeni klubuyla müqavilə bağlaya bilmir. Bütün bunlara əsas səbəb isə “zolaqlılar”ın hazırkı baş məşqçisi Vinfrid Şeferdi.
Məlum olduğu kimi, `Bakı` hələlik Şeferin kompensasiya məsələsini tam yoluna qoymuyub. Aydın məsələdi ki, almaniyalı mütəxəssis vaxtından əvvəl işindən azad olunduğuna görə, böyük məbləğdə pul tələb edir. Komanda yeddinci pillədə qərarlaşsa da, Şeferi uğursuzluq düşündürmür. Onu ancaq pul narahat edir.
Yeri gəlmişkən, hazırda Şeferin `Bakı`da qalması da müzakirə olunur. Lakin başqa vəzifədə çalışması şərtilə. Bu haqda klubun baş meneceri Zeynal Məmmədovun dediklərini dinləyək: “Hazırda Şeferin kompensasiya məsələsinin həlliylə məşğuluq. Belə bir variant da var ki, onu klubda saxlayaq, fərqli bir vəzifədə. Starkovla müqavilə bağlamaq istəsək də, hələlik bu, mümkün deyil. Çünki Şeferin müqaviləsi hələ də qüvvədədi. Bir müqaviləni ləğv etmək lazımdı ki, digərini bağlaya bilək”.
