10 yanvar 2011 15:38
Hərbi komissarlıq Kamran Ağayevlə Əfran İsmayılovun yolunu gözləyir
Yeni ilin ilk günlərindən Azərbaycan futbolunu yeni həyəcan dalğası bürüyüb. Azerisport.az xəbər verir ki, bütün ölkə vətəndaşları kimi, əsgərlik yaşına çatmış futbolçularımız da hərbi xidmətə yollanmağa başlayıb.
Xəbər verdiyimiz kimi, artıq `Bakı`nın iki futbolçusu – Bəxtiyar Soltanovla Emin Cəfərquliyev vətənin keşiyini çəkməyə yollanıb. Lakin xeyli sayda başqa futbolçularımız da var ki, hələlik onların aqibətinin necə olacağı maraqla gözlənilir.
Bu mənada ilk növbədə Premyer Liqamızın lideri olan `Neftçi`nin heyətindəki gənc futbolçuları göstərmək olar. Paytaxt klubunda hərbi xidmətə yollanmayan 5 futbolçu var. Bunlar Rail Məlikov, Ruslan Abışov, Amit Quluzadə, Mirhüseyn Seyidov və Fərid Quliyevdi. Aydın məsələdi ki, bakılılar bu oyunçulardan heç birini, xüsusilə millinin də aparıcı üzvlərindən olan Rail Məlikovla Ruslan Abışovu hərbi xidmətə yola salmaq istəmir. Hansı ki, artıq bu oyunçuların hamısı komandayla birgə Türkiyədə toplanışda davam edir və əsgərliyə gedəcəkləri inandırıcı görünmür.
Ağdamın `Qarabağ` klubunun da aparıcı oyunçularından çağırışçılar var. Bunlar Maksim Medvedev, Elvin Məmmədov və Əfran İsmayılovdu. Halbuki, hər 3 futbolçu komandasının da, yığmamızın da aparıcı üzvlərindən hesab olunurlar. Hazıda isə komandayla birgə Türkiyədə toplanışdadılar.
`Xəzər Lənkəran`da da belə aparıcı futbolçular var. Cənub klubunun kapitanı olan qapıçı Kamran Ağayev və yarımmüdafiəçi Kamran Ağayevin yolunu gözləyirlər. Lakin millimizin 1 nömrəli qapıçısının hərbi xidmətə yollanması nə qədər başadüşülən olsa da, onun əsgərliyə gedəcəyi halda, hərbi xidmətdən sonrakı durumunun necə olacağı qaranlıq qalır.
Hərbi komissarlıqdan həmin oyunçularla bağlı vəziyyətə belə münasibət bildirirlər: “Əgər onlar hərbi xidmətdə olmayıblarsa, hər birini orduya cəlb etməyimiz mümkündü. Azərbaycan Respublikasında yaşayan hər bir kişi hərbi xidmətdə olmalıdı. Bu, idmançılara da, digər peşə sahiblərinə də, hər kəsə aiddi”.
Lakin bir daha qeyd edək ki, yuxarıda adlarını çəkdiyimiz futbolçulardan heç kimin hərbi xidmətə yollanacağı inandırıcı görünmür. Çünki onların hamısı hazırda komandalarıyla birgə Antalyada təlim-məşq toplanışındadılar.
