10 yanvar 2011 16:50
Starkov: `Bakı`ya latviyalı futbolçular da aparacağam
`Bakı`nın baş məşqçisi olacaq Aleksandr Starkov ölkəsindən olan jurnalistlərə müsahibə verib. Azerisport.az həmin müsahibə ilə sizi də tanış edir:
- Belə başa düşdük ki, isti diyara gedişiniz dəqiqləşib və siz Latviyanı tərk edirsiz...
- Bəli. Demək olar ki, mənim `Bakı`ya keçidim tam həllini tapıb. Azərbaycan klubunun sabiq baş məşqçisi, məşhur almaniyalı mütəxəssis Vinfrid Şefer istefaya göndərilib. Yeri gəlmişkən, mən qərarımı birdən-birə verməmişəm. Hələ ötən il `Bakı` rəhbərliyi ilə ilkin danışıqlar aparmışam. İndi isə məsələyə tam aydınlıq gəlib.
- Bizim qurbağa bataqlığında dombalaq aşmaq sizi bezdirdi?
- Dərhal bildirim ki, mən heç yerdə belə deməmişəm və heç vaxt da deməyəcəyəm. Mən Latviya çempionatına hörmətlə yanaşıram. Hazırda `Skonto`da olduğu kimi, gənclərlə işləmək həmişə mənim üçün maraqlı olub. Üstəlik, onlar inkişaf edirlər. Əks halda, heç bir çempionluq haqda söhbət gedə bilməzdi.
- Bakıya tək gedirsiniz?
- Xeyr. Moskva `Spartak`ında birgə işlədiyim İqor Klesov yeni klubumda da mənə kömək etməyə razılıq verdi.
- Latviyalı futbolçuları da özünüzlə aparacaqsınız?
- Belə variant istisna deyil. Axı sirr deyil ki, Azərbaycanda ilk növbədə maliyyə şərtləri bizdəkindən çox yaxşıdı. Gənclər isə perspektiv görməlidir. Əks halda, öz yerində sayacaqlar.
- Artıq yeni komanda haqda təsəvvürünüz var? Onu iş başında görmüsünüz?
- Canlı görməsəm də, bir neçə oyununun videoyazısına baxmışam. Futbolçularla qarşıdakı günlərdə tanış olacağam. Yeri gəlmişkən, komandada müqavilə ilə 16 legioner var. Hazırda Azərbaycan çempionatında fasilədi. Mən komandanı ilk oyuna fevralın 12-də çıxarmalıyam. Həmin oyunlar həlledici olacaq. Çünki `Bakı`nı ilk “alılığ”a düşmək üçün ciddi və ağır mübarizə gözləyir. Sonra da final mərhələsində mükafatlar, eləcə də son illər Azərbaycan klublarının pis nəticələr əldə etmədiyi Avropa kuboklarına vəsiqə uğrunda oyunlar olacaq.
- Latviya yığmasının baş məşqçi postunda qalacaqsınız?
- Bəli, qalıram. Bakıya gəlişimdə bu, mənim əsas şərtlərimdən biri idi. Razıyam, çətin olacaq. Amma mənim Latviya yığmasında kifayət qədər güclü məşqçi heyətim var. Birgə səylərimizlə işimizin öhdəsindən gələcəyimizə inanıram.
