10 yanvar 2011 23:05
İlin qolunun müəllifi türkiyəli futbolçu oldu (VİDEO)
Bu gün FİFA tərəfindən İsveçrənin Sürix şəhərində düzənlənən möhtəşən tədbirdə ötən ilin ən yaxşı qolunun müəllifi müəyyənləşib. Azerisport.az xəbər verir ki, dünya futbol qurumu “Puşkas 2010” mükafatını bu dəfə Türkiyə millisinin də şərəfini qoruyan Almaniyanın `Bayern` klubunun hücumçusu Hamit Altıntopa verib.
Qeyd edək ki, FİFA-nın rəsmi saytının istifadəçiləri tərəfindən müəyyənləşdirilən sorğunun namizədləri arasında Şimali İrlandiyadan Burrous, Fransadan Nəsri, Argentinadan Messi, Hollandiyadan Roben və Van Bronxorst, Braziliyadan Neymar, İsveçdən Hallenius, Yaponiyadan Yokoyama, Cənubi Afrika Respublikasından Tsabalala da var idi. FIFA Futbol Komitəsi bu namizədlərin qollarını estetikliyinə, matçın önəminə, şans faktoruna və rəqip komandanın xətalarının az olmasına görə fərqləndirdiyini hələ öncədən açıqlamışdı. Lakin azarkeşlərin səsverməsi nəticəsində həmin qollar arasında ən yaxşı məhz Altıntopun qolu seçilib. Hansı ki, Həmit həmin qolu məhz millimizin də yer aldığı AÇ-2012-nin seçmə mərhələsi çərçivəsində Qazaxıstanla keçirilən oyunda vurmuşdu.
