12 yanvar 2011 13:08
Millimiz FİFA reytinqində yenə irəlilədi
Bu gün FİFA yanvar ayı üçün dünya yığma komandalarının növbəti reytinq siyahısını açıqlayıb. Azerisport.az xəbər verir ki, Azərbaycan milli komandası 1 pillə irəliləyərək, hazırda 97-ci pillədə qərarlaşıb. Komandamızın hesabında 343 xal var.
Berti Foqtsun komandasının qabaqlamaq imkanına malik olduğu rəqibləri isə Boliviya (344), Nigeriya (349) və Qrenadadı. Bir uğurlu oyun millimizin dünyanın 94-cüsü edə bilər.
Komandamızın AÇ-2012-nin seçmə mərhələsindəki rəqiblərinə gəlincə, Almaniya yığması 1485 xalla 3-cü pillədəki mövqeyini qoruyub. Qrupumuzun digər favoriti Türkiyə millisi də yerini qorumağı bacarıb (74 xalla 31-ci yer). Avstriya da yerində sayan rəqiblərimizdəndi (569 xalla 46-cı pillə). Belçika yığması isə bir pillə geriləyib. Yığmamızın növbəti rəqibi olan belçikalılar - 58-ci pilləyə düşüblər, hesablarında isə 526 xal var. Qrupumuzun autsayderi Qazaxıstan isə bir pillə irəliləməsiylə diqqət çəkir. Qazaxlar 161 xalla 137-ci yerdə qərarlaşıblar.
Keçmiş SSRİ ölkələri arasında Azərbaycan Qazaxıstan və Özbəkistanı (108-ci yer, 285 xal), Türkmənistanı (133; 173), Tacikistanı (143; 141) və Qırğızıstanı (175; 50) qabaqlayır. Rusiya isə bu ölkələr arasında liderlik edir. Şimal qonşularımız 982 xalla 13-cü pillədədilər. Ukrayna 34-cü (702), Belarus 37-ci (660), Litva 55-ci (532), Ermənistan 60-cı (515), Gürcüstan 72-ci (449), Latviya 76-cı (440), Moldova 84-cü (411), Estoniya 86-cıdı.
Azərbaycanın yaxınlarda yoldaşlıq oyunu keçirməyə hazırlaşdığı Macarıstan isə FİFA reytinqində 632 xalla 41-cidi.
Bütövlükdə isə, siyahıya İspaniya millisi başçılıq edir. Son dünya çempionları 1887 xalla zirvədəki mövqelərini qoruyublar. Elə ikinci pillədəki Hollandiya millisi də 1723 xalla əvvəlki mövqeyində qalmağı bacarıb. İlk onluqda yeganə dəyişiklik Xorvatiyanın (1075 xal) Misiri (1036) 9-cu pillədən 10-cu yerə sıxışdırmasıdı. Braziliya 4-cü (1446), Argentina 5-ci (1338), İngiltərə 6-cı (1195), Uruqvay 7-ci (1152), Portuqaliya isə 8-ci pillədəki (1090) mövqeyini qoruyub.
