12 yanvar 2011 18:34
“Qoy haqqımda deməsinlər ki, komandanı yarıyolda qoyub getdi”
AZAL-ın baş məşqçisi Nazim Süleymanov azerisport.az saytına müsahibəsində komandasının hazırkı toplanışından, transferlərdən və Qazaxıstandan aldığı təkliflərdən danışıb.
- Ötən ilin sonunda Qazaxıstan klublarından gələn təkliflərdən imtinanıza nə səbəb vardı?
- Bu mövzuya yenidən qayıtmaq istəməzdim. Mən onda da söyləmişdim ki, hazırkı komandamda başladığım işi sona çatdırmaq istəyirəm. Əgər işləməsəydim, onda bu təkliflərə baxmaq olardı. Mənim müqaviləm ilin sonuna kimidi. Bu müddət ərzində isə qarşıma qoyulan vəzifəni həyata keçirməliyəm. Qoy mənim haqqımda deməsinlər ki, AZAL-ı yarıyolda qoyub getdi. Qoy həmin klublar da düşünməsin ki, Nazim Süleymanov bizi də eyni şəkildə atıb gedə bilər. Namusla düşünmək lazımdı.
- Ramiz Məmmədov, Elxan Abdullayev və Vaqif Sadıqovun ölkə xaricində işə başlamasını necə qiymətləndirirsiz?
- Müsbət. Hamısı işsiz idi və əgər işsizsənsə və xaricdən belə bir dəvət gəlirsə, niyə də qəbul etməməlisən? Əminəm ki, onlar işlərinin öhdəsindən layiqincə gələ biləcəklər.
- Bizim məşqçilər buna tam qadirdilər?
- Siz elə hesab edirsiz ki, Qazaxıstan futbolunun səviyyəsi bizimkindən güclüdü? Bu, belə deyil. Orda heç dil problemi də olmayacaq. Yəqin ki, onlar başdan hardan getdiklərini bilirdilər. Əgər klub rəhbərliyi onlara inanırsa, qalır sadəcə işləmək və özünü göstərmək.
- Yeri gəlmişkən, yanvarın 12-dən 17-nə kimi komandanız Bakıda təlim-məşq toplanışı keçirəcək və 2 yoxlama matçı keçirəcək. Bu komandalar məlumdurmu?
- Bəli, artıq tapmışıq. Ayın 14-də öz əvəzedicilərimizlə oynayacağıq. İki gün sonra isə `Simurq`la. Bu oyunların əhəmiyyəti ondadı ki, futbolçular oyun təcrübələrini bərpa etsinlər. Həmçinin onların fiziki hazırlıqlarının yüksəldilməsinə də xüsusi diqqət yetiririk.
- Bəs Türkiyə toplanışında `Zarya` və `Obolon`dan başqa hansı klublarla oynayacaqsız?
- Bütövlükdə 4 yoxlama görüşü keçirəcəyik. Biz daha iki rəqib axtarışındayıq. Düşünürəm ki, bu, elə də ciddi problem olmaz.
- AZAL-ı kimlər gücləndirəcək?
- Biz artıq özbək Aleksandr Şadrini düşərgəmizə dəvət etmişik. Hücumameylli yarımmüdafiəçi hələ baxışda olacaq. Bosniyalı və makedoniyalı oyunçuları da gözləyirdik. Ancaq onlar əlverişsiz hava şəraiti səbəbindən birbaşa Antalyadakı hazırlığımıza qoşulacaqlar. Bosniya-Herseqovina, Makedoniya ilə yanaşı Belarus, Bolqarıstan, Kolumbiya, Latviya və Braziliyadan da oyunçular gözləyirik.
- Bəs neçə futbolçuyla mqavilə bağlamağı planlaşdırırsız?
- 3-4 futbolçuyla. Yenicə MOİK-dən Cavid Rəhimovu baxışa çağırmışıq. Ancaq o, heç də son yerli futbolçu olmaya bilər.
- Robertas Poşkusun AZAL-a keçidi gündəmdədi...
- Bu barədə heç bir danışıq olmayıb. Biz tərəfdən Poşkusu almaqla bağlı hansısa təklif də olunmayıb.
