12 yanvar 2011 19:37
Amit `Neftçi`nin düşərgəsini tərk etdi (FOTO)
Türkiyənin ən nəhəng klublarından biri olan `Fenerbahçe`dən transfer təklifi alan `Neftçi`nin gənc futbolçusu Amit Quluzadə komandanın sıralarını tərk edib. Azerisport.az xəbər verir ki, buna səbəb Antalyada təlim-məşq toplanışında olan "ağ-qaralar"ın futbolçusunun `Fenerbahçe`yə keçməsidi.
İstanbul təmsilçisinin rəsmiləri Antalyaya gələrək, Amiti `Fener`in düşərgəsinə aparıblar. Amit Quluzadənin yola salınma mərasimində `Neftçi`nin vitse-prezidenti Tahir Süleymanov, baş məşqçi Arif Əsədov, məşqçilər korpusu, texniki heyətlə yanaşı, komandanın digər üzvləri də iştirak ediblər. Tədbirdə çıxış edən klubun vitse-prezidenti Tahir Süleymanov Amit Quluzadənin Türkiyə klubuna transfer olunmasını Azərbaycan futbolunun və `Neftçi`nin böyük uğuru adlandırıb. O qeyd edib ki, Araz Abdullayevin İngiltərəyə transfer olunmasından sonra Amitin Türkiyə klubuna keçidi ölkə futbolunun inkişafına böyük təkan verəcək. Vitse-prezident iki klub arasında anlaşma olduğunu və bu anlaşmanın tezliklə rəsmiləşəcəyini diqqətə çatdırıb.
Baş məşqçi Arif Əsədov da mərasimdə öz fikirlərini bildirib: "Qoy gedib Azərbaycan futbolunu layiqli təmsil etsin, digər futbolçularımıza da yol açılsın. Ona uğurlar arzulayıram".
Komandanın kapitanı Rail Məlikov Amit Quluzadənin Azərbaycanı qardaş ölkədə layiqincə təmsil edəcəyinə inandıqlarını söyləyib və ona uğurlar arzulayıb.
Görüşdə Amit Quluzadə çıxış edərək, ona göstərilən diqqətə görə klub prezidenti Sadıq Sadıqova təşəkkürünü bildirib. Gənc futbolçu Türkiyənin 4 ən böyük klubundan biri olan `Fenerbahçe`də `Neftçi`nin və Azərbaycanın adını uca tutacağını söyləyib.
