12 yanvar 2011 12:32
Ruslan Əmircanov: Mənə bir daha şans vermələrini xahiş etdim
Antalyada təlim-məşq toplanışında olan `Neftçi`nin düşərgəsində olan müdafiəçi Ruslan Əmircanov klubun rəsmi saytına fikirlərini açıqlayıb. Azerisport.az xəbər verir ki, o, açıqlamasında bunları dilə gətirib:
“Mən qış fasiləsində transferə çıxarılmışdım. Baş məşqçimiz Arif Əsədov yığmaya namizəd futbolçulardan biri olduğum üçün, daha çox oynaya biləcəyim komandaya keçməyimi istəyirdi. Ancaq mən klub rəhbərliyi və baş məşqçi ilə söhbət edib, onlardan mənə bir daha şans vermələrini xahiş etdim. Sağ olsunlar, məni anlayışla qarşıladılar, etimad göstərib klubda saxladılar. İnanın, özümü `Neftçi`dən başqa heç yerdə təsəvvür edə bilmirəm. Sanki uzun illərdir bu komandanın şərəfini qoruyuram. İkiqat əzmlə məşq edib, əsas heyətdə meydana çıxmaq üçün çalışacağam. Flaqmanın heyətində yüksək səviyyədə rəqabət var. Baş məşqçimiz məşqdə ən yaxşı tərəfdən özünü göstərənlərə hər zaman şans verir. Çalışıb, onun etimadını doğruldacağam”.
