13 yanvar 2011 01:12
Rəşad Sadıqov: Huntelaar və Raul mənim üçün əlavə qayğı yaratmırdı
Milli komandamızın kapitanı, Türkiyənin `Eskişehirspor` klubunun müdafiəçisi Rəşad Sadıqov azerisport.az və “Zerkalo”nun suallarını cavablayıb, dünən keçirilən Almaniyanın `Schalke` klubuyla yoldaşlıq görüşünü (1:1) və təlim-məşq toplanışını dəyərləndirib.
- Yoldaşlıq oyununu necə dəyərləndirərdin?
- Görüş çox maraqlı mübarizə şəraitində keçdi. Biz çox güclü rəqiblə qarşılaşırdıq. Belə matçlar da həmişə faydalı olur.
- Niyə üstünlüyünüzü qoruya bilmədiniz?
- Biz erkən qol vurduq və sonradan da saysız-hesabsız qol vəziyyətlərimiz oldu. Lakin həmin epizodların hamısı korlandığından fərqi artıra bilmədik. Hələ, bir epizodda hakim `Schalke`nin qapısına penalti təyin etmədi. Rəqib bizim üçün az sayda təhlükə yaradırdı ki, onlardan da biri zamanı cinah asmasından sonrq qapımızdan qol buraxdıq.
- Özünüzü günahkar hesab edirsiz?
- Bəli, bunda mənim günahım vardı. Mən Rakitiçə mane olmağa borclu idim ki, dəqiq zərbə vura bilməsin. Ancaq təəssüf ki, ona çata bilmədim.
- Bu fakt sizin əhvalınızı çoxmu korlayıb?
- Prinsipcə, deməzdim ki, bütövlükdə öz oyunumdan narazı qaldım, sadəcə həmin epizodu “bağlamaq” lazım idi. Yoldaşlıq oyunları ondan ötrüdü ki, səhvlərin üzərində işləyəsən, çatışmazlıqları aradan qaldırasan.
- Maraqlıdı, `Real`ın keçmiş əfsanəsi Raula qarşı oynamaq necə idi?
- Şübhəsiz ki, Huntelaar, Raul, Farfan və digər futbolçular `Schalke`nin ulduzlarıdı, amma onlar mənim üçün əlavə qayğı yaratmırdı. Fikrimcə, rəsmi oyunda daha çətin olardı.
- Siz iki 90 dəqiqə meydanda oldunuz. `Ergsebirge` ilə oyunda 90 dəqiqə və `Werder`lə də görüşdə demək olar ki, yarım saat oynamışdız. Öz çıxışınızdan razısınız?
- Bu haqda nəsə demək istəmirəm. Mənə elə gəlir ki, baş məşqçimiz özü üçün müəyyən təəssüratlara malikdi.
- Üç ardıcıl oyunda şans qazanmağınız əsas heyətə dönüşünüzə şərait yarada bilər?
- Əsas Superliqanın oyunlarıdı. Rəsmi oyunlarda şans qazanmaq lazımdı.
- Beş gün ərzində 3 görüş keçirdiniz. Sınaqlar yorucu deyil ki?
- Biz toplanışda müntəzəm məşqlər keçirik, çox yüklənirik. İndi çox işləmək, hazırlaşmaq lazımdı ki, forma yığa bilək.
- `Villem II` ilə oyuna güc qalıbmı?
- Ümid edirəm ki, yenə oynayaram. Mənim fiziki yüklənməylə bağlı problemim yoxdu. Hər oyundan sonra yorğunluq olsa da, növbəti matça kimi yenidən öz gücümü bərpa edirəm.
