14 yanvar 2011 13:46
Vitali Kovalyov: Türkiyənin birinci liqası Premyer Liqamızdan güclüdü
Türkiyənin Bank Asiya birinci liqasında çıxış edən `Kartalspor`un azərbaycanlı qapıçısı Vitali Kovalyov azerisport.az və “Zerkalo”ya müsahibə verib.
- Təlim-məşq toplanışınız necə keçir?
- Çox ağırdı. Təsəvvür edin ki, gündə 3 dəfə məşqə çıxırıq. Birincisi səhər 6-da başlayır. Artıq 3 yoxlama görüşü keçirmişik. Yanvarın 15-də `Gaziantepspor`la qarşılaşacağıq. Ondan sonra isə çempionatın davamının başlamasını gözləyəcəyik.
- 17 komanda arasında 16-cısız. Bunun səbəbi nədi?
- Bizdə qol epizodlarından yararlanmaq baxımından ciddi problemlər var. Birinci dövrədə hətta 5 penalti epizodundan da yararlana bilməmişik. Öz meydanımızda hələ bir dəfə də olsun, qol buraxmamışıq. Doqquz qolsuz heç-heçəmiz var. 16 oyuna cəmi 12 qol buraxmışıq.
- Ancaq bu gedişlə sizi aşağı liqaya düşmək təhlükəsi gözləyir...
- Bizdə baş məşqçi dəyişikliyinə əl atıldı. Odu ki, indi ikinci dövrədə birinci liqadakı yerimizi qorumaq üçün əlimizdən gələni etməyə çalışacağıq.
- Birinci dövrədə siz meydana çıxmadınız. Bu sizi narahat etmir?
- Bir nömrə çox güclüdü. Həm də o, yerlidi, ona daha çox üstünlük verirlər. Mənə mane olan əsas məqam ondan ibarətdi ki, yığmada çıxış etmirəm. Hər məşqdə kifayət qədər çalışıram ki, özümü göstərim. Amma hələ ki, alınmır.16 oyundan 10-da qol buraxmayıb.
- Komandanı dəyişmək barədə düşünmürsüz?
- Rəhbərlik buraxmaq istəmir. Baxmayaraq ki, bu haqda düşünürəm. Müqaviləmin müddəti mayda başa çatacaq, tezliklə komandanın sıralarını tərk edəcəm.
- Türkiyədə çox qalacaqsız?
- Burda qalmaq istəmirəm. Hər halda vətənə qayıdaram. Bu mövsümün əvvəlində Premyer Liqa klublarımızdan iki real təklif var idi. Ancaq obyektiv səbəblər səbəbindən burda qalmalı oldum.
- Ona görə ki, Azərbaycan Premyer Liqası hələ yerində sayır?
- Onsuz da Türkiyənin birinci liqası bizim çempionatdan daha yaxşıdı. Burda staionlar daha yaxşıdı, tribunalar doludu. Burda daha çox hücum futboluna üstünlük verirlər.
- Deməli, Türkiyədə qapıçıların işi daha çətindi...
- Hər oyunda yaradılan qol vəziyyətləri bizim çempionatdakından 3 dəfə çoxdu. Burda həm də tələbkarlıq yüksək səviyyədədi.
