14 yanvar 2011 02:22
Hiddink: Futbolçularımı da Azərbaycanla oyuna məhz belə kökləyəcəm
Türkiyə yığmasının baş məşqçisi Qus Hiddink azerisport.az saytının suallarını cavablayıb.
- Azərbaycanla oyundan sonra Türkiyə yığması rəhbərliyiniz altında heç də yaxş günlər keçirmədiyinə görə həyəcan hiss olunur...
- Biz Azərbaycan yığmasıyla oyundan sonra işimizdən soyumamışıq. Mənim vəzifəm öz komandamı AÇ-2012-yə çıxarmaqdı. Biz öz işimizi iki məğlubiyyətlə çətinləşdirdik. Bundan sonra qələbə qazanmalıyıq. Bunun üçün də düşünürəm ki, heyətdə bəzi islahatlar aparmağa ehtiyac var idi.
- Bakıdakı görüşü analiz etmisizmi?
- Bütün oyunlarda olduğu kimi, bəli. Bu oyunda biz uduzmamalıydıq. Təəssüf ki, sensasiyaya mane ola bilmədik.
- Azərbaycan yığmasında nə kimi dəyişiklikləri qeyd edə bilərsiz?
- Bu iki oyun arasından elə də çox vaxt keçməmişdi. Heyət demək olar ki, həminki idi. Fədakarlıq da olduğu kimi, qalmışdı.
- Siz artıq ikinci dəfəydi ki, Bakıdan heç də yaxşı olmayan əhval-ruhiyyədə ayrıldınız.
- Birinci dəfə Rusiya yığması ilə Bakıya heç də turnir əhəmiyyəti qalmayan bir oyunda qarşılaşmaq üçün gəlmişdim. Onda bizim üçün hər şey forma xarakter daşıyırdı.
- Nəticədə istisna olmaqla?
- Nəticə ancaq sizə lazım idi.
- Ancaq Bakıdakı xal itkisi sizin Rusiya yığmasındakı fəaliyyətinizin sonu kimi dəyərləndirilməyə başladı...
- Hər şeyin başlanğıcı Almaniya yığmasına məğlubiyyət oldu.
- Qorxmursuz ki, yenə eyni aqibət təkrarlana bilər? Axı almanlara yenilgidən sonra yenə Berti Foqtsun komandasına qalib gələ bilmədiniz, baxmayaraq ki, bu dəfəki komandanız Türkiyədi.
- Bizim bu situasiyadan çıxmaq üçün kifayət qədər informasiyamız var.
- Deməli, Azərbaycanla cavab oyununa ciddi köklənməli olacaqsız?
- İlk oyundakı kimi.
- Komandanızı revanş əhval-ruhiyyəsində kökləyəcəksiz?
- Ola bilər ki, futbolçular bu haqda düşünsün, amma mən, dəqiq deyirəm ki, yox. Məni daha çox yaxşı oyun və 3 xal maraqlandıracaq. Yetirmələrimi də belə kökləməyə çalışacağam.
- Yəqin ki, yetirmələrinizin qarşısına bu vəzifəni də qoyacaqsız ki, Bakıda buraxdığınız qol epizodunda olduğu kimi səhv buraxmasınlar?
- Azərbaycan bir də bizə elə qol vura bilməyəcək. Bağışlayın, getməyim lazımdı. Bizim hələ bu haqda danışmağa imkanımız olacaq. Axı oyuna kimi kifayət qədər vaxtımız var.
