14 yanvar 2011 14:44
Ramiz Məmmədov erməni futbolçuya görə qalmaqalla üzləşdi
Qazaxıstanın `Atırau` klubunda qalmaqal yaranıb. Azerisport.az xəbər verir ki, nə qədər xoş xəbər olmasa da, qalmaqalın mərkəzindəki əsas şəsxlərdən biri komandanın azərbaycanlı baş məşqçisi Ramiz Məmmədovdu.
Qazaxıstanın sports.kz portalı yazır ki, `Atırau` azarkeşləri Məmmədovun Azərbaycan mətbuatına verdiyi müsahibədən qəzəblənib. Ramiz Məmmədovun həmin müsahibədə onların xoşuna gəlməyən isə bu sözləri olub: “Mən bildiyimə görə, Karabaxtsyan artıq `Atırau`nun oyunçusu deyil. Əgər belə olmasa, o zaman klub rəhbərliyi ilə danışacam. Əgər mən burda işləyirəmsə, bu klubda erməni olmayacaq”.
Məmmədovun bu fikirlərinə `Atırau` azarkeşlərinin cavabı da özünü çox gecikdirməyib: “Biz, `Atırau` futbol klubunun azarkeşləri Məmmədovun diqqətinə çatdırmaq istəyirik ki, Qazaxıstan çoxmillətli dövlətdi, hansı ki, burda 100-dən çox millətin nümayəndəsi yaşayır”. Bəyanatda həmçinin bildirilir ki, komandada həmişə qazaxlarla çiyin-çiyinə ruslar, azərbaycanlılar, çeçenlər, ukraynalılar və digər ölkələrdən olan futbolçular çıxış ediblər. Eləcə də `Atırau`nu stadionda fərqli millətlərin nümayəndələrinin dəstəklədiyi iddia olunub:
Azarkeşlər hesab edir ki, yeni baş məşqçinin bu şəkildə çıxış etməsi heç də düzgün deyil və Karabaxtsyana qarşı da hörmətsizlikdi. Onlar futbolun dünyada bir nömrəli idman növü olduğunu qeyd etməklə yanaşı, bu populyar idman növünün şəhərlərinin, regionun və ölkələrinin imicini də müəyyənləşdirən faktor kimi dəyərləndiriblər.
“Bizi sizin Dağlıq Qarabağ probleminiz maraqlandırmır. Buna görə də bu münaqişənizi özünüzüə saxlayın, Azərbaycanda. İndi isə siz Qazaxıstandasınız!!! Burda millətçiliyə yer yoxdu! Bizim şəhərdə və ölkədə belə şeylər qəbul olunmur. Siz artıq bu millətçi düşüncələrinizlə azarkeşlər, fanatlar arasında hörmətinizi itirdiniz” – deyə `Atırau` azarkeşləri qeyd edib.
