14 yanvar 2011 12:09
Flavinyo: `Xəzər Lənkəran`la oyuna kimi sıraya dönəcəm
`Neftçi`nin braziliyalı yarımmüdafiəçisi Flavinyo azerisport.az və `Zerkalo`ya müsahibə verib.
- Özünüzü necə hiss edirsiz?
- Artıq ayağım 80 faiz əvvəlki gücüylə işləyə bilir. Düşünürəm ki, `Xəzər Lənkəran`la oyuna kimi sıraya dönəcəm. Hələlik ancaq qaçıram. Ən çətin dövrü isə arxada qalmış hesab etmək olar.
- `Xəzər Lənkəran`la oyun sizin üçün nə dərəcədə prinsipial əhəmiyyət daşıyır?
- Əlbəttə, əsas rəqibə qarşı oynamağı mən də istəyirəm. Ancaq yeni ildəki ilk oyunum `Turan`la görüşə də təsadüf etsə, gərək ona tam hazır olum.
- Sizin `Muğan`la oyunda zədələndiyiniz dövrdən bəri `Neftçi`nin nəticələrində, oyununda bir növ enmə hiss olunmağa başladı...
- Mən bunu heç də öz yoxluğumla əlaqələndirməzdim. Mövsümün əvvəlində mən də yaxşı oyun sərgiləmirdim. Digər tərəfdən mənim zədələnməyimdən sonra həmin mövqedə oynayan futbolçu bu mövqeyinə yenicə alışmağa başlayırdı.
- Ancaq əksər uğursuzluqlarda olmamağınız özünü göstərirdi...
- Mənə çox xoşdu ki, belə dəyər verilir. Deməli, mən komanda üçün vacib bir fiquram. Ancaq mənsiz də `Neftçi` çox güclü görünür.
- Komandanız hələlik transfer bazarında çox passiv görünür. Ola bilər ki, sizə heç güclənməyə ehtiyac yoxdu?
- Hazırkı vəziyyətdə heyətimiz çox yaxşıdı. Premyer Liqa üçün bu heyəti yetərli hesab edirəm, hansı ki, ilk dövrədə də lazımı şəkildə özünü göstərə bildi. Ancaq avrokuboklara vəsiqə qazanandan sonra vəziyyət dəyişə bilər. Əgər bir qədər də güclü oyunçular dəvət olunsa, onda `Neftçi` daha güclü olacaq.
- Sizcə, hansı mövqenin güclənməsinə ehtiyac var?
- Bu, mənim səlahiyyətimdə olan məsələ deyil. Baxmayaraq ki, mənim fikrimcə, hələlik bizim əlavə oyunçuya ehtiyacımız yoxdu. Mənim fikrimcə, bütün mövqelərdə sıxlıq və lazımı rəqabət var.
- Bu heyəti beynəlxalq arena üçün yetərli hesab edirsən?
- Hər ehtimala qarşı mövsümün sonunda bir qədər güclənməyimiz lazımdı. Çünki ən azı bizim digər rəqiblərimiz güclənməyə çalışacaq. İstəyirik ki, avrokuboklarda da uğurlu çıxış edək.
- Yeri gəlmişkən, “uğurlu” deməklə nəyi nəzərdə tutursuz?
- (Gülür) Məsələ burasındadı ki, mən hələ heç vaxt Çempionlar Liqasında, Avropa Liqasında çıxış etməmişəm. Mən bu turnirləri ancaq televizordan izləyə bilmişəm. `Neftçi` mənim karyeramda ilk təcrübə olacaq. Mənim üçün bu çox böyük arzudu.
