15 yanvar 2011 15:09
Rəşad Sadıqovun komanda yoldaşı məhkəməlik oldu
Millimizin kapitanı Rəşad Sadıqovun Türkiyənin `Eskişehirspor` klubunda komanda yoldaşı olan Batuhan Karadeniz məhkəməyə verilib. Azerisport.az xəbər verir ki, digər Superliqa təmsilçisi `Kasımpaşa`da çıxış edən Merthan Açıl Karadenizin maddi-mənəvi təzminat ödəməsi tələbi ilə məhkəməyə müraciət edib.
Qeyd edək ki, buna Superliqanın 17-ci turunda oynanılan `Kasımpaşa` - `Eskişehirspor` matçında qonaq komandanın oyunçusu Batuhan Merthanın ayağına basaraq, rəqibini ciddi şəkildə zədəlimişdi. Meydan sahiblərinin 0:2 hesabıyla məğlub olduğu qarşılaşmanın 40-cı dəqiqəsində baş verən bu hadisə azmış kimi, Karadeniz oyunu saxlamamış və ələ keçirdiyi topla irəliləyərək, komandasını hesabda önə keçirmişdi. Merthan həkimlərin köməyi sayəsində oyuna davam etsə də, matçdan sonrakı müayinə zamanı sağ ayağının iki barmağında qırıq aşkarlanmışdı.
Məhz həmin olay nəticəsində əməliyyat olunan və 3 ay yaşıl meydanlardan uzaq qalacaq Merthan üstündən bir müddət keçməsinə baxmayaraq, Batuhanın həmin hərəkəti qəsdən etdiyi iddiasıyla məhkəməyə müraciət etməyə qərar verib.
