15 yanvar 2011 17:28
`Roma`nın sabiq oyunçusu `Xəzər Lənkəran`da (FOTO)
Antalyada təlim məşq toplanışında olan `Xəzər Lənkəran`ın düşərgəsinə daha üç futbolçu gəlib. Bunlar Rumıniyanın `Gaz-Metan` klubundan azad agent kimi gələn qapıçı Kosmin Vatça, son klubu Kluj `Universtatya`sı olan 28 yaşlı arxa xətt oyunçusu Adrian Pit və 25 yaşlı hücuma meylli yarımmüdafiəçi Çiacu Hristudu.
Xatırladaq ki, Hristu Rumıniyanın U-21 və U-23 də 20 oyun keçirib və üç qol vurub. Son klubu isə `Politexnika` (Timişiora) olub. Adrian Pit isə 2007/10 mövsümlərində İtaliyanın aparıcı klublarından olan `Roma`nın da şərəfini qoruyub. Hər üç rumıniyalı futbolçu dünən axşam saatlarından `Xəzər Lənkəran`a baxışdan keçmək üçün gəliblər.
Bu gün komanda yalnız bir dəfə axşam məşqinə çıxacaq, gündüz isə futbolçulara istirahət veriləcək. Bununla belə komandaya yeni qoşulan baxışa gəlmiş futbolçular səhər saatlarında məşqçilər korpusunun nəzarətində yüngül idmanla məşğul olublar.
Qeyd edək ki, düşərgəyə daha iki futbolçu təşrif buyurub. Hər ikisi makedoniyalı olan Dusan Saviç və Georgi Mojsov haqda da yekun qərar qarşıdakı günlərdə veriləcək. Qeyd edək ki, Savic Makedoniya millisində 6 dəfə meydana cıxıb.
