15 yanvar 2011 17:32
`Neftçi`nin futbolçuları alış-veriş mərkəzində
Təlim-məşq toplanışı üçün Türkiyənin Antalya şəhərini özünə məskən seçən `Neftçi` bu günü bir məşqlə başa vurub. Azerisport.az xəbər verir ki, yerli vaxtla saat 10:45-də “Titanik” otelinin stadionunda başlayan səhər məşqi 2 saat davam edib və fiziki hazırlığa önəm verilib.
Baş məşqçi Arif Əsədovun rəhbərliyi altında keçən məşqdə əsas təlimatları fiziki hazırlıq üzrə türkiyəli məşqçi Mehmet Ak verib. Futbolçular əsasən kross qaçışlarını yerinə yetiriblər.
Hazırlıq proqramına əsasən bu gün toplu çalışmalardan ibarət olan axşam məşqi olmayacaq. Əvəzində komandanın nahardan sonra Antalyanın ən böyük alış-veriş mərkəzlərindən biri olan “Deepo”ya baş çəkməsi nəzərdə tutulub.
Qeyd edək ki, sabahdan etibarən komanda üzvləri gündə iki dəfə olmaqla məşqlərini davam etdirəcəklər.
