16 yanvar 2011 11:25
Mişel Platini: Azərbaycan futbolunun daha parlaq günləri hələ qarşıdadı
Dünən keçirilən “Birlik Kuboku”nun rəsmi açılış mərasiminin ardından UEFA prezidenti Mişel Platini azerisport.az saytının əməkdaşının suallarını cavablayıb.
- Siz hər il “Birlik Kuboku”nu izləməyə gəlsəz də, bu turnirin imicini qaldırmağa elə də kömək etmir...
- Mən çox şadam ki, MDB ölkələri arasında bu turnir hələ də keçirilməkdədi. Bu, çox vacib turnirdi, hansı ki, keçmiş Sovet ölkələrini bir-birilə birləşdirir. Bəzi problemlərə baxmayaraq, turnir davam etdirilməlidi. Klubların özləri də turnirin yanvarda keçirilməsinə öyrəşib. Buna görə də biz “Birlik Kuboku”nu daha da inkişaf etdirmək istəyirik. Yəqin ki, gələcəkdə yeni ideyaları gerçəkləşdirməklə buna nail olarıq.
- Sizcə, nə etmək lazımdı ki, bütün klublar bu turnirə əsas heyətləri ilə gəlsinlər?
- Bu sualı təşkilat komitəsinə ünvanlamalısız. Axı əgər komanda bu turnirdən imtina edirsə, deməli onun bundan da vacib işləri var.
- Üç il öncəki “Birlik Kuboku”nun finalını unutmamısız?
- Xatirimdədi, onda Azərbaycan klubu finalda qələbə qazandı. Ümumiyyətlə, Azərbaycan klubları bu turnirə çox ciddi yanaşır. Yadımdadı ki, azarkeşləriniz həmin qələbəyə necə sevinirdi. Düşünürəm ki, bu mövsüm Azərbaycandan olan komanda yaxşı futbol sərgiləyəcək. Ancaq proqnoz vermək istəməzdim. Axı turnir hələ yenicə başlayıb.
- İstisna etmirsiz ki, kubok üçüncü dəfə Azərbaycan klubuna nəsib ola bilər?
- Bunu turnirin gedişi göstərəcək. Kimin güclü olduğunu final matçında biləcəyik.
- Bütövlükdə Azərbaycan futbolu haqda nə deyə bilərsiz?
- Sizin futbol federasiyanız ölkədə bu idman növünün inkişafı üçün çoxlu işlər görür. Ancaq qarşıda hələ görüləsi çox işiniz var. Ümid edirəm ki, Azərbaycan futbolunun daha parlaq günləri hələ qarşıdadı.
- Avropa komandalarında çoxlu legionerlər top qovur. Rəhbərlik etdiyiniz qurum buna qarşı hansı tədbirləri həyata keçirməyi planlaşdırır?
- Bu çox geniş mövzudu. Biz bu barədə yeri gəldikcə, öz fikirlərimizi bildiririk. Bu məsələni ayrıca müzakirə etmək lazımdı.
- Final oyununa qalacaqsız?
- Hələ bilmirəm. Bu suala cavab vermək çox çətindi. Qrafik çox sıxdı.
