17 yanvar 2011 12:06
“Elvin maliyyə şərtlərinə görə yox, ümumiyyətlə `Qarabağ`da qalmaq istəmir”
`Qarabağ`ın baş məşqçisi Qurban Qurbanov azerisport.az saytına müsahibəsində hazırkı toplanışın gedişi, Elvin Məmmədov və hərbi xidmətlə bağlı vəziyyətə dair sualları cavablayıb.
- Toplanış necə gedir?
- Hələlik hər şey normaldı. Gördüyünüz kimi, çalışmaq üçün şərtlər də çox yaxşıdı. Ən başlıcası odu ki, meydanlar yaxşıdı. Hava şəraiti də idealdı. Rəşad Kərimov istisna olmaqla heyətdə zədəlimizin olmaması da ürəkaçandı.
- Çempionatın bu vaxta qədərki dövründə siz millinin təlim-məşq toplanışlarından, kadr çatışmazlığından şikayətlənirdiz. Amma indi yeni futbolçuların sayının elə də çox olmadığını görürük...
- Hazırda xüsusi kadr problemimiz yoxdu. Yeni oyunçular almaq üçün isə hələ vaxtımız var. Digər tərəfdən biz 5-6 futbolçu almağa hazırlaşmırıq. Cəmi 2 legioner götürəcəyik.
- Az olmayacaq? Axı qarşıda milli komandamızın çoxlu toplanışları olacaq, həm də çempionatın əsas hissəsi hələ qabaqdadı...
- Onsuz da mən daha çox özümüzkülərə üstünlük verirəm, düşünürəm ki, bu qədər kadr bizə bəs edəcək.
- `Qarabağ` 4-5 yoxlama matçı keçirəcək. Rumıniya, Qazaxıstan, Ukrayna klublarını isə elə də güclü klublar sırasına aid etmək olmaz. Olmazdı ki, Almaniya, Hollandiya klubları ilə sınaq matçları təşkil edəsiz? Axı onlar burda kifayət qədərdi...
- Mən deməzdim ki, bizim rəqiblərimiz zəifdi. Normal komandalardı. Sadəcə bir fakta diqqət yetirmək lazımdı ki, Almaniya, Hollandiya klubları indi tam hazır vəziyyətdədilər. Biz isə hələ yenicə hazırlıqlara başlamışıq. Biz hələ onlarla rəqabət apara biləcək gücdə deyilik. Ona görə də uyğun komandalar seçmişik.
- Komandaya Bosniya və Makedoniyadan futbolçular çağırmışdınız. `Qarabağ` hələ supertransferlər etmək hadaq düşünmür?
- Oyunçu seçimində mən çox kaprizli adamam. Oyunçunu öz gözlərimlə görməsəm, onun imkanlarına bələd olmasam, seçim edə bilmərəm. Biz bilməliyik ki, onun oyunçu keyfiyyətləri nə dərəcədə komandamıza uyğundu? Eyni zamanda xarakteri də az əhəmiyyət daşımır.
- Elvin Məmmədovla danışıqlarınız nə yerdə qaldı?
- Hələlik ümumi dil tapa bilməmişik. Biz qalmaq istəməyən futbolçunu saxlamaq istəmirik. Ola bilər ki, digər komandada ona daha yaxşı olacaq. O, millinin oyunçusudu və bizimlə müqavilə bağlamasa belə, gedişinə mane olmayacağıq. Maya kimi oynayacaq. Ancaq çalışacağıq ki, komandada saxlayaq.
- Elvin nə qədər tələb edir ki, klub onun bu tələbini yerinə yetirmək istəmir?
- Belə şeyləri açıqlamaq düzgün çıxmır. Bildiyimə görə, o, ümumiyyətlə `Qarabağ`da qalmaq istəmir.
- İlin əvvəlində Azərbaycan yığmasının oyunçuları hərbi xidmətə çağırılmağa başladılar. Komandanızın da aparıcı üzvlərini itirməkdən qorxmursuz ki?
- Ölkəmizin hər bir vətəndaşının hərbi xidmətdə olması onun borcudu. Ancaq digər tərəfdən futbolun inkişafına dair dövlət proqramı var. Çoxları yığma komandamıza dəvət olunur. Fikrimcə, AFFA bu məsələni yoluna qoyar. Axı bu dövlət səviyyəsində həll olunan məsələdi. İstəməzdim ki, komandamın əsas fiqurlarını itirim. Ancaq lazım gəlsə, göndərməliyik. Lazım olsa, gedəcəklər.
- Çox azarkeşlər belə hesab edir ki, milli üzvləri hərbi xidmətdən azad olunmalıdı. Çünki onlar da ölkəmizi beynəlxalq arenada təmsil etməklə məşğuldu...
- Bu mənada elə `Qarabağ`ın Avropa Liqasındakı uğurlarını götürək. Axı həmin uğurları məhz bu futbolçular əldə edib. İndi onlarda elə bir dövrdü ki, daha da inkişaf etdirmək, ustalıqlarını artırmaları lazımdı. Qoy bunlar da hərbi xidmətlərini meydanda çəksinlər.
