18 yanvar 2011 21:06
`Neftçi` `Rubin`lə oyundan imtina etdi (YENİLƏNİB)
Türkiyənin Antalya şəhərində təlim-məşq toplanışında olan Bakının `Neftçi` klubu Rusiyanın `Rubin` komandası ilə qarşılaşmaqdan imtina edib. Azerisport.az xəbər verir ki, bu görüşün sabah - yanvarın 19-da Türkiyə vaxtı ilə saat 18:00-da keçirilməsi nəzərdə tutulmuşdu.
Lakin `Rubin` klubunun nümayəndələri bu gün `Neftçi`yə müraciət edərək, oyunun yerli vaxtla saat 15:00-da keçirilməsini istəyiblər. Bu isə Antalyada hazırlıq prosesi keçən `Neftçi`nin qrafikinə uyğun olmadığına görə, paytaxt klubu oyunun keçirilməsindən imtina edib. Hər gün Antalyada iki məşq prosesi keçən “ağ-qaralar” səhər məşqini yerli vaxtla saat 10:30-da, axşam məşqini isə 18:00-da keçirir. `Rubin`lə qarşılaşmadan imtinanın da səbəbi bu olub.
Dərhal yoxlama görüşü keçirmək üçün komanda axtarışına çıxan `Neftçi` nümayəndələri Rusiyanın `SKA-Energiya` komandası ilə anlaşıblar. Beləliklə, `Neftçi` yanvarın 19-da Türkiyə vaxtı ilə saat 18:00-da Rusiyanın `SKA-Energiya` komandası ilə yoxlama oyunu keçirəcək.
