18 yanvar 2011 18:52
XL Superliqanın autsayderinə darmadağın oldu (YENİLƏNİB)
Türkiyənin Antalya şəhərində təşkil olunan təlim-məşq toplanışını davam etdirən `Xəzər Lənkəran` bu gün hazırlıq prosesi çərçivəsində növbəti sınaq matçına çıxıb. Azerisport.az xəbər verir ki, yeni ildəki ilk matçında həmyerlimiz Ramiz Məmmədovun çalışdırdığı `Atırau`ya 1:2 hesabıyla məğlub olan təmsilçimizin bu dəfəki rəqibi Türkiyənin Superliqa klubu `Kasımpaşa` olub.
Qeyd edək ki, bu komanda Türkiyə çempionatının ilk dövrəsindən sonra sonuncu pillədə gedirdi və bu üzdən Mirça Rednikin yetirmələrinin asan qələbə qazanacağına ümid bəsləmək olardı. Lakin qarşılaşmanın gedişində hər şey tərsinə oldu. Türkiyə çempionatının autsayderi Premyer Liqamızın liderlərindən olan XL-ı darmadağın etdi.
Yoldaşlıq oyunu
18 yanvar
KASIMPAŞA – XƏZƏR LƏNKƏRAN - 4:1
Qarşılaşmada hesabı 14-cü dəqiqədə Sebah açıb. 26-cı dəqiqədə Dieqo hesabı bərabərləşdirsə də, 31-ci dəqiqədə Öztürk yenidən türkləri hesabda önə keçirib. 52-ci dəqiqədə Varelanın sayəsində türklər daha bir qol vurub. Matçda son nöqtəni isə Aydın qoyub - 4:1.
