19 yanvar 2011 13:53
Hacı Hacıyev `Anji`yə yeni azərbaycanlı futbolçu aparır
Rusiyanın `Anji` klubunun baş məşqçisi Hacı Hacıyev Rusiya mətbuatına açıqlamasında bu ayın əvvəlindəki Bakı səfəri barədə məlumat verib. Azerisport.az xəbər verir ki, söhbət əsnasında Mahaçqala klubunun çalışdırıcısı maraqlı məlumatı dilə gətirib:
- Bu səfərimi klub rəhbərliyinin qərarına əsasən həyata keçirdim. Səfər çərçivəsində Azərbaycan və Rusiya futbolunun inkişafına dair bir sıra sualların aradan qaldırılması barədə fikir mübadiləsi apardıq. Bizi Azərbaycanın futbol bazarı maraqlandırır. Digər tərəfdən istəyirik ki, onların oyunçuları öz ustalıqlarını artırsınlar, milli komandaya düşsünlər. Ən sonda Dağıstan və Azərbaycan futbol federasiyaları arasında təcrübə mübadiləsinə dair sözləşmə imzaladıq.
- Belə başa düşdük ki, `Anji` gənc azərbaycanlı futbolçular üçün sınaq meydanı olacaq?
- Tam mümkündü. Amma təbii ki, həmin oyunçular Rusiya Premyer Liqasında çıxış edə biləcək səviyyədədirlərsə...
- Onda tezliklə komandanızda belə bir futbolçunu görə biləcəyikmi?
- Türkiyədəki toplanışa bir futbolçu dəvət etmişik. Amma hələlik onun soyadını açıqlaya bilmərəm.
