19 yanvar 2011 15:58
Qurban Qurbanov qazaxlara məğlubiyyətin səbəbini açıqladı
`Qarabağ`ın Antalyada keçirdiyi təlim-məşq toplanışında ilk yoxlama oyununa çıxdı və Qazaxıstanın `Jetisu` klubuna 2:3 hesabıyla məğlub oldu. Azerisport.az xəbər verir ki, oyundan sonra komandanın baş məşqçisi Qurban Qurbanov matçla bağlı fikirlərini bildirib:
“Məlum olduğu kimi cəmi 8 gündür hazırlıqlara başlamışıq. Adətən belə oyunlar keçirməyin faydası olur. 2 hissədə fərqli komanda meydana buraxdıq. Çalışdıq ki, hamının durumuna nəzər yetirək. Əlbəttə ki, yoxlama oyunlarında nəticədən daha çox komandanın ümumi oyunu, bir-biriylə anlaşma və s. kimi komponentlər vacibdir. Hazırda sağlam olan bütün futbolçulara şans verdik. İlqar Qurbanov məşqlərə yeni başlayıb. Ona görə də onu çox yükləmək istəmədik. Əfran isə dünəndən komandayla çalışır. Maksimin isə sol ayaq əzələsində bir qədər problem var. Rəşad Kərimov isə hələ bir həftə sonra komandayla çalışmalara başlayacaq. Zaur Həşimov və Namiq Yusifov isə xəstəlikləri səbəbindən bugünkü oyunda iştirak edə bilmədilər. Hələ hazırlıq üçün yetərincə vaxtımız var. Daha çox çalışmalı və çempionata qədər hazır vəziyyətə gəlməliyik”.
