19 yanvar 2011 11:28
İlqar Qurbanov: `Fenerbahçe`ni Dauma görə tərk etdim
`Qarabağ`ın qış transfer pəncərəsində heyətinə qatdığı ilk futbolçu – İlqar Qurbanov azerisport.az və “Zerkalo”ya müsahibə verib.
- Sizin `Qarabağ`a keçməkdən başqa hansısa variantınız yox idi?
- Hətta olsaydı da, `Qarabağ` mənim üçün indiki halda ən ideal variant idi. Tez-tez klub dəyişdirdiyimdən, hamı elə hesab edir ki, İlqar Qurbanov baş məşqçiləri ilə dil tapa bilmir. Ağdam klubundakı işimlə hər şeyin əksini sübut edəcəm.
- Deməli, siz hesab edirsiz ki, klubları tez-tez dəyişməyinizdə heç də özünüz günahkar deyilsiz?
- Öz günahlarımı üzərimdən götürmərəm. Gəncliyimdə mənim də müəyyən səhvlərim olub. Ancaq bütün günahların məndə olduğunu iddia etmək də düzgün deyil.
- Bu fakt sizə psixoloji cəhətdən pis təsir etmirmi?
- Dəqiq deyirəm ki, bütün bu usandırıcı məqamlar artıq geridə qalıb.
- `Qarabağ`a keçidinizi özünüz üçün karyeranızda həlledici məqam hesab etmirsiz?
- Ola bilər ki, kimlərsə belə düşünür, amma mən yox. Mənim hələ elə yaşım yoxdu ki, nəsə sərhəd qoyum, şansdan danışım. Bilirsiz ki, çıxış etdiyim komandalarda heç də bacardığım futbolu tam şəkildə göstərə bilməmişəm.
- Hesab etmirsiz ki, karyeranızda dönüş anı məhz o vaxt `Fenerbahçe`ni tərk etmək oldu?
- Çoxları hesab edir ki, mən o dövrdə İstanbul klubunu tərk etməli deyildim. Ancaq mən onda baş məşqçi Kristof Daumun istəyi ilə komandadan göndərildim. Artıq əvəzedici heyətdə də oynaya bilməzdim, çünki əsas komandaya keçmişdim. Odu ki, mənim hansısa başqa variantım yox idi.
- Niyə yarım illik müqavilə bağlamısız?
- Danışıqlar zamanı belə qərara aldıq ki, mövsümü bitirək, ondan sonra şərtləri yenidən müzakirə edərik. Hazırda mənim üçün sadəcə oynamaq vacib idi.
- Rəqabət sizi qorxutmur? `Qarabağ`da gənc oyunçular az deyil və digər tərəfdən yeni legionerlər də alınır...
- Mənə işləmək və özümü göstərmək gərəkdi. Qurban Qurbanovun mənə şans verəcəyinə də inanıram.
