20 yanvar 2011 12:48
Zenit matçın vaxtını dəyişmək istədi, İnter razılaşmadı
Rusiya çempionu “Zenit”in rəhbərliyi Azərbaycan təmsilçisi “İnter”ə müraciət edib. Azerisport.az xəbər verir ki, müraciətdə paytaxt klubundan “Birlik Kuboku”nun yarımfinal mərhələsi çərçivəsində keçiriləcək oyunun vaxtının dəyişdirilməsi xahiş olunub.
Peterburqlular doğma meydanda baş tutacaq və 17:00-a planlaşdırılan görüşün 20:00-a (Bakı vaxtilə 21:00) dəyişdirilməsini istəyib. Onların bu istəyi isə, tribunalara daha çox azarkeşin gəlməsinə hesablanıb. Maraq üçün qeyd edək ki, onlar eyni təklifi 1/4 finalda qarşılaşdıqları Finlandiyanın HİK klubuna da etmiş, lakin rədd cavabı almışdılar.
Elə Azərbaycan çempionu da rusların bu təklifini qəbul etmək fikrində deyil. Hər halda paytaxt klubunun prezidenti Georgi Nikolovun azerisport.az saytına müsahibəsində dilə gətirdikləri belə deməyə əsas verir: “Zenit” belə bir təkliflə bizə müraciət edib. Mən də öz növbəmdə baş məşqçi Kaxaber Sxadadze ilə əlaqə saxladım. Sonda belə qərara gəldik ki, bu nəinki azarkeşlər, həm də oyunçular baxımından bizim üçün əlverişli deyil. Həm də təşkilatçılar oyunun başlama vaxtını daha vacib səbəblərə görə dəyişdirə bilər, belə şeylərə görə yox”.
