20 yanvar 2011 16:36
Rəşad Sadıqov: Azərbaycan 5 ilə Türkiyə futboluna çatacaq
Türkiyənin “Eskişehirspor” klubunun və millimizin üzvü Rəşad Sadıqov, qardaş ölkə mətbuatına müsahibə verib. Azerisport.az xəbər verir ki, həmyerlimiz türkiyəlu jurnalistlərə maraqlı açıqlamalar verib.
Superliqanın cari mövsümündə “Trabzonspor”un çempionluq yarışında digər rəqiblərinə görə daha şanslı olduğunu söyləyən Sadıqov, elə bu komandanın da qızıl medallara sahib çıxmasını istədiyini bildirib.
Türkiyəyə “Eskişehirspor”dan öncə də gəldiyini və “Kayserispor”, “Kocaelispor”da top qovduğunu xatırladan millimizin kapitanı ilk gəldiyi Kayseridə hər şeyin onun üçün yaxşı başladığını, ancaq daha sonra bəzi səbəblər üzündən yetərincə uğur qazana bilmədiyini açıqlayıb. Zədə və digər səbəblər ucbatından “Kayseri”dən ayrıldığını və ardından transfer olduğu “Kocaelispor”da çətin günlər keçirdiyini qeyd edən Rəşad bunları söyləyib: “Komandada maddi anlamda problemlər çox idi. Mübarizəmizi sona kimi apardıq, amma liqada qala bilmədik. Sonra Azərbaycana döndüm. Bu dəfə isə “Eskişehirspor”a gəldim. İnşallah bu dəfə uzun müddətli olar və daha uğurlu alınar”.
Türkiyə futbolu haqqında düşüncələrini ifadə edən Sadiqov, “Məncə türk futbolu 7-8 ildi yerində sayır, amma daha da inkişaf etməsi lazım idi. Burada olan futbolçulara, məşqçilərə, tərəfdarlara görə, daha çox öndə olmaq lazım idi”.
Türk futbolu ilə Azərbaycan futbolu arasında çox fərq olduğunu açıqlayan Rəşad “Siz bizdən çox öndəsiniz. Amma bizdə də futbol sonuncu federasiya prezidentinin seçilməsinin ardından 2-3 ildi inkişaf etməyə başlayıb. Azərbaycan futbolu 5 ilə Türkiyənin futboluna çata bilər”.
Hər yöndə olduğu kimi futbolda da iki ölkə arasındakı münasibətlərin çox yaxşı olduğunu dilə gətirən Rəşad daha sonra bunları dilə gətirib: “Azərbaycanda Türkiyə futbolu və futbolçuları çox yaxından təqib olunur. Amma Türkiyədə bizim futbol o qədər də izlənilmir. Bu da normaldı. Hər halda yuxarıdakılar aşağıya baxmaz, aşağıdakılar yuxarı baxar. Dünyanın her yerində bu belədi”.
Dünya və Avropa çempionatlarında qatılamadığımızı bildirən Sadıqov əvəzində belə yarışlarda iştirak edən Türkiyəni öz komandamız hesab etdiyimizi söyləyib: “Qazandığınız zaman, uşaqlar kimi küçələrə çıxıb, bunu qeyd edərik”.
Hətta Bakıda keçirilən AÇ-2012-nin seçmə mərhələsinin Azərbaycan – Türkiyə matçında da (1:0) stadionun yarısının qardaş ölkəyə azarkeşlik etdiyini bildirən Rəşad “Bu, matçlarda çox az görülən bir şeydi. Sanki Türkiyə səfərdə çıxış etmirdi. Futbolçuları elan edərkən, hər iki tərəfi birlikdə alqışlayırdılar” – deyə söyləyib.
Həmin tarixi görüşdə vurduğu qoldan sonra heç kimin təzyiqi ilə üzləşmədiyini söyləyən Rəşad o oyuna kimi 3 ay futbol oynamadığını da xüsusi qeyd edib. “Eskişehirspor”da start heyətində oynayamadığını xatırladan Sadıqov, o matçın özü üçün çox önəmli olduğunu dilə gətirib: “O, mənim üçün bir şansdı. Hər kəs, Türkiyə, Azərbaycan, məşqçilər o matçı izləyir. Bunu bilirdim. Amma qol atacağımı heç düşünmüdüm. Korner oldu. Öncədən hazırladığımzı bir ev tapşırığını yerinə yetirdik. Mən vurdum və sondta qol oldu. Allahıma şükürlər olsun”.
