21 yanvar 2011 22:16
Mourinyo - Valdano böhranı böyüyür
İspaniyanın “Real” (Madrid) klubunun baş məşqçisi Joze Mourinyo ilə idman direktoru Xorxe Valdano arasındakı böhran getdikcə böyüyür. Azerisport.az İspaniya mətbuatına istinadən xəbər verir ki, Valdano ilə heç cür yola gedə bilməyən portuqaliyalı mütəxəssis mövsümün sonunda bu komandadan gedəcəyini dəqiqləşdirib.
Onların bir-biriylə yola getməməsinə əsas səbəb kimi isə, hər ikisinin öz dediyinin olmasını istəməsidi. Ancaq təbii ki, heç bir şeydə fikirləri üst-üstə düşmür.
“Real”ın dünən Madrid derbisində “Atletico”nu kubokdan kənarlaşdırmasının ardından Valdano, portuqaliyalı mütəxəssislə aralarında heç bir problem olmadığını iddia edib. Ancaq Mourinyo onun dediklərini təkzib edib:
"Valdano ilə aranızda problem varmı?" sualına, "Şərhim yoxdu" cavabını verən təcrübəli mütəxəssis mövsümün sonunda komandadan ayrıla biləcəyinin siqnallarını verib: “Real”la 4 illik müqaviləm var. Amma futbolda müqavilələrdən də önəmli olan şeylər var. Önəmli olan hər kəsin xoşbəxt olması və bir arada çalışa bilməsidi. Mən sadəcə, hər kəs xoşbəxt olduğu müddət ərzində postumda qalacağam”.
