21 yanvar 2011 22:33
Jabayla Roşanın Bakı`dan qovulmasının səbəbi məlum oldu
Xəbər verdiyimiz kimi, “Bakı” klubunun yeni baş məşqçisi Aleksandr Starkov 3 futbolçunun xidmətindən imtina edib. Azerisport.az xəbər verir ki, həmin oyunçular Jaba, Leandro Roşa və Cefferson Anqulodu.
Bu arada paytaxt klubunun Media və Marketinq Departamentinin direktoru Nəriman Mehdiyev lent.az-a açıqlamasında onların qovulmasının səbəbini açıqlayıb. Mehdiyevin sözlərinə görə, Latviyalı mütəxəssisi belə sərt tədbirə əl atmağa braziliyalı legionerlərin təlim-məşq toplantısına gecikmələri vadar edib. Cənubi amerikalı legionerlər yanvarın 15-dən Türkiyənin Antalya şəhərində hazırlıq prosesi keçən “Bakı”nın düşərgəsinə bu gün qoşulublar. Starkov isə onları məşqə və Qazaxıstanın “Akjayik” klubu ilə yoxlama matçına buraxmayıb.
Klub rəsmisi hələlik bu futbolçuların komandadan xaric olunmaları barədə rəsmi qərarın verilmədiyini söyləyib: “Jaba və Roşa əsas heyət oyunçularıdır, bir sıra oyunlarda “Bakı”ya vacib qələbə gətirən qollara imza atıblar. Baş məşqçimiz isə onları yaxından tanımır. Starkov 3 futbolçunu nəyə görə komandadan kənarlaşdırdığını rəhbərliyə əsaslandırmalıdır. Bundan sonra klubumuz rəsmi qərar verəcək”.
Qeyd edək ki, Jaba və Leandro Roşa braziliyalı, Cefferson Anqulo isə kolumbiyalıdı.
