22 yanvar 2011 11:33
Rövşən Əmiraslanov: Şaxtyor`dan da güclüyük
Son Azərbaycan çempionu “İnter”in hücumçusu Rövşən Əmiraslanov azerisport.az saytının suallarını cavablayıb.
- Az adam inanardı ki, siz “Zenit”ə 5:0 hesabıyla qalib gələrsiz.
- Bizə ikinci dəqiqədə vurduğumuz qol çox böyük kömək etdi. Axı məhz bundan sonra rəqib dərhal hücumlara atılmağa başladı, hesabı bərabərləşdirməyə çalışırdılar. Belədə “Zenit”in açıq zonaları yaranırdı ki, bundan da yararlanıb ikinci qolu vurduq. Üçüncü qoldan sonra isə artıq hər şey həllini tapmışdı.
- Siz artıq sonradan meydana çıxmanıza rəğmən, ikinci dəfədi qol vurursuz. Özünüzü final matçında əsas heyətdə görürsüzmü?
- Hər bir futbolçu heyətə düşməsini, daha da yaxşı oynamasını istəyir. Mənə çox xoşdu ki, artıq bu turnirdə ikinci qolumu vurdum. Ancaq “Şaxtyor”la da oyunun heyətini baş məşqçi müəyyənləşdirir. Əgər Sxadadze hesab etsə ki, mən lazımam, o zaman kömək etməyə hazıram.
- Ancaq hələlik əsas heyət uğrundakı mübarizədə uduzduğunuzu qəbul edirsiz yəqin ki?
- “İnter”də rəqabət çox yüksəkdi. Ona görə də hər kəz öz üzərində çalışır ki, daha da yaxşı olsun.
- “Zenit” necə təəssürat yaratdı?
- Onların heyəti gənclərdən ibarət idi və yaxşı vəziyyətdə idilər, normal görünürdülər. Xüsusilə Matyaşı qeyd edərdim. O, daim qapımız qarşısında təhlükə yaratmağa çalışırdı. Ancaq biz ikiqat güclü idik, öz ustalığımızı göstərdik.
- “Şaxtyor”la final matçından nə gözləyirsiz?
- Bu komanda çox yaxşı futbol sərgiləyir. Biz rəqibə hörmət edirik, ancaq “İnter” daha güclüdü. Bu kubok mütləq bizim olmalıdı. Əgər “Şaxtyor”a da qalib gələ bilsək, onda öz oyunumuzun nəticəsini görmüş olacağıq, favorit statumuzu doğruldacağıq.
- “Şaxtyor”un heyətlə bağlı da problemləri var, hər halda üstünlük sizdə olacaq...
- Onlar finala qədər gəliblərsə, deməli ciddi rəqibdilər və hər ehtimala qarşı ciddi yanaşmalıyıq. Biz çalışacağıq ki, hər şeyə əsas vaxtda aydınlıq gətirək.
- “Birlik Kuboku” “İnter”ə nə verəcək?
- Bu oyun hər kəsin forma geymək istədiyi bir qarşılaşma olacaq. Əgər biz finala kimi gəlmişiksə, artıq burda dayanmaq yaxşı olmazdı. Bura bu qədər azarkeş gəlib, onları məyus etməməliyik və kuboka sahib çıxmalıyıq.
