23 yanvar 2011 00:14
İranla İraq qitə çempionatından kənarlaşdırıldı
Qətərdə düzənlənən Asiya çempionatında 1/4 final mərhələsinin oyunlarına yekun vurulub. Azerisport.az xəbər verir ki, qitə birinciliyinin pley-off mərhələsindəki ikinci oyun günündə də iki qarşılaşma baş tutub.
Avstraliya İraqla qarşılaşıb. Matçın əsas vaxtı qolsuz tamamlandığından qalibi müəyyənləşdirmək üçün əlavə vaxt təyin edilib. Məhz əlavə vaxtın sonlarında Türkiyənin “Galatasaray” klubunun şərəfini qoruyan Harri Kyuel avstraliyalıları yarımfinala çıxaran qola imza atıb. Elə İran – Cənui Koreya matçında da oxşar ssenari təkrarlanıb. Bu görüşdə də məhz əlavə vaxtda vurulan qol koreyalıları növbəti mərhələyə çıxarıb.
Qeyd edək ki, bir gün öncəki gündə də Yaponiya ilə Özbəkistan yarımfinala vəsiqə qazanmışdı. Beləliklə, finala çıxmaq uğrunda yanvarın 25-də keçiriləcək görüşlərdə Özbəkistan Avstraliya, Yaponiya isə Cənubi Koreya ilə münasibətlərinə aydınlıq gətirəcək.
Asiya Kuboku
1/4 final
22 yanvar
Avstraliya – İraq – 1:0 (əlavə vaxtda)
Qol: Kyuel, 118.
İran – Cənui Koreya – 0:1 (əlavə vaxtda)
Qol: B.Yun, 105.
Yarımfinal
25 yanvar
Özbəkistan – Avstraliya
Yaponiya – Cənubi Koreya
