24 yanvar 2011 00:52
Cahangir Hacıyev: İnter`i Çempionlar Liqasında görmək istəyirəm
“Beynəlxalq Bank”ın rəhbəri, son Azərbaycan çempionu “İnter”in idarə heyətinin sədri Cahangir Hacıyev azerisport.az saytına müsahibəsində komandasının “Birlik Kuboku”nun qalibi olmasıyla bağlı fikirlərini açıqlayıb.
- Qələbə münasibətilə sizi təbrik edirik!
- Mən çox şadam ki, “İnter” Sankt-Peterburqda özü üçün yeni bir tarix yazdı. Komanda turnirə uğurlu start verdi, layiqli oyun sərgilədi və sonda da kuboka sahib çıxdı. Turnirin gedişində Ermənistandan olan komandanı məğlubiyyətə uğratdılar, “Zenit”in əvəzedici heyətini darmadağın etdilər. Final oyunu hər şeyin həlli demək idi və gördüyüyünüz kimi, “İnter” son görüşdə də layiqli oyunla öz sözünü deməyi bacardı.
- Bəs siz bu 110 dəqiqə ərzində nə hiss etdiniz?
- 110 dəqiqə bir ilə bərabər oldu. Komandalar çox yaxşı oyun sərgilədilər, göstərdilər ki, layiqli finaldı. Mən sadəcə o haqda düşünürdüm ki, istifadə olunmayan qol vəziyyətləri uşaqlara təsir edə bilər. Ancaq əmin idim ki, kubok bizim olacaq.
- Hətta “Şaxtyor” penalti seriyasını uğurla başa vurmağa yaxın olduğu vaxtda da?
- Mən Georgi Lomayaya inanırdım. Qapıçımız bu gün çox yaxşı idi. O, komandanın qələbə qazanmasında çox böyük rol oynadı, sadəcə möhtəşəm idi.
- “Birlik Kuboku”ndan sonra nələr düşünürsüz?
- İndi Azərbaycan çempionatı haqda düşünməliyik. Yenə titulumuzu qorumaq uğrundakı mübarizəmizi davam etdirməliyik. Mən bu komandaya azarkeşlik edirəm və onu Çempionlar Liqasında görmək istəyirəm.
- Ancaq “Birlik Kuboku”nu qazanan komandalarımızın çempionatda uğursuzluğu tendensiyası var...
- Hər şey komandadan asılıdı. Əgər onlar özlərinə tez gəlsələr, onda çempionatda uğurlu çıxış etməyə nail ola bilərlər. “İnter” yüksəlişdədi, siz də gördünüz ki, onlar necə oynayırdılar. Altı oyunda onlar bir dən də olsun qol buraxmadılar.
- Qış transfer pəncərəsində yeni futbolçular gətirməyə hazırlaşırsızmı?
- Bu işlərlə baş məşqçi məşğul olur. O, kimi desə, komandaya gətirməyə çalışırıq. Transfer çalışmaları barədə qərarlar məşqçilər korpusunun sərəncamındadı.
