24 yanvar 2011 16:14
Ağasəlim Mircavadov: Hələ öncədən demişdim ki, İnter Birlik Kubokunu qazanacaq
“Birlik Kuboku”nun ikiqat qalibi Ağasəlim Mircavadov azerisport.az saytına müsahibəsində son ölkə çempionu “İnter”in Sankt-Peterburqda baş tutan sayca 19-cu belə turnirin qalibi olmasına münasibətini bildirib.
“Mən hələ “Birlik Kuboku”ndan öncə də demişdim ki, “İnter” bu turnirdə öz oyununu göstərə bilsə, mütləq qalib olacaq. Çünki əksər komandalar bu turnirə əvəzedici heyətlə, iddiasız gəlmişdilər, bəzi ölkələrin çempionları ümumiyyətlə yarışa qatılmaqdan imtina etmişdi”.
2006-cı ildə “Neftçi”, 2008-ci ildə isə “Xəzər Lənkəran”la “Birlik Kuboku”nun qızıl medallarına sahib çıxan təcrübəli mütəxəssis bildirir ki, “bankirlər”in yalnız bir oyununu izləyə bilib: “Bu, Ermənistanın “Mika” klubuna qarşı oyun idi. Mənim üçün çox maraqlıydı bu oyuna baxmaq, çünki qarşılaşmanın necə nəticələnməsinin çox böyük əhəmiyyəti var idi. Nəticə məni həddən artıq təəccübləndirdi: “Mika” “İnter”dən aşkar zəif idi. Bizim çempion onları 1/4 finalda mütləq məğlub etməliydi və bunu da elə gözəl şəkildə həyata keçirdilər”.
Mircavadovun fikrincə, Azərbaycan klubları yenə bu turnirdə uğurlu çıxış etməyə can atmalıdılar, lakin turnirin təşkilində bəzi dəyişikliklər edilmək şərtilə: “Bir çox ölkələr artıq bu turnirə elə də ciddi yanaşmırlar. Bunun qarşısını almaq üçün mütləq əks tədbirlər görülməlidi. Deyilənlərə görə, artıq gələn ildən formatda dəyişikliklər edəcəklər. Ümid edirəm ki, yeni format da bizim komandalar üçün düşərli olacaq”.
Son Mircavadov “İnter”i təbrik etməklə yanaşı, bildirib ki, bu dəfəki “Birlik Kuboku”nu “Neftçi” və “Xəzər Lənkəran”ın qazandıqları ilə müqayisə etmək düzgün deyil.
