26 yanvar 2011 13:17
Maris Verpakovskis Bakı`da?
Yunanıstanın "Erqotelis" klubunun latviyalı hücumçusu Maris Verpakovskis karyerasını ölkəmizdə davam etdirə bilər. Azerisport.az Latviya mətbuatına istinadən xəbər verir ki, “Bakı”nın yeni baş məşqçisi Aleksandr Starkov ölkəsinin ən tanınmış futbolçularından olan Verpakovskisi komandasında görmək istəyir.
Qeyd edək ki, 31 yaşlı hücumçu 1995-1996 mövsümlərində Latviyanın "Baltika", 1996-2000-də "Metalurq" və 2000-2003-də "Skonto" klublarında çıxış edib. 2003-cü ildə Kiyev "Dinamo"suna transfer olunan futbolçu, 2007-ci ildə İspaniya "Xetafe"sində, 2007-2008-də Xorvatiya "Hayduk"unda, 2008-də İspaniya "Selta"sında da top qovub. 2009-cu ilədn isə Yunanıstanda çıxış edir.
1999-cu ildən 82 dəfə Latviya millisinin formasını geyinən forvard 47 qola imza atıb. Verpakovskis 2 dəfə Latviya çempionluğunu (2001, 2002), 2 dəfə Latviya Kubokunu (2001, 2002), 1 dəfə Ukrayna çempionluğunu (2004), 2 dəfə Ukrayna Kubokunu (2005, 2006) qazanıb. 2001-ci ildə Latviya millisi ilə "Baltika Kuboku"nun qalibi olub.
Müqavilə ilə Kiyev "Dinamo"suna məxsus olan latviyalı ukraynalılara lazım olmadığından, "Bakı"ya transferi və icarəyə verilməsi mümkündü.
Qeyd edək ki, Verpakovskisi 2009-cu ildə "İnter" də heyətinə qatmaq istəyirdi.
