27 yanvar 2011 15:23
Rəşad Abdullayev: Daha güclü rəqiblərlə oynamalıyıq
“Neftçi”nin yarımmüdafiəçisi Rəşad Abdullayev azerisport.az saytına müsahibəsində Türkiyənin Antalya şəhərindəki hazırlıq prosesini dəyərləndirib.
- Türkiyədəki ilk toplanış zamanı zədə səbəbindən mən yalnız iki məşqdə iştirak edə bilmişdim. Demək olar ki, hazırlığı buraxmalı oldum. Ancaq düşünmürəm ki, bu, fiziki kondisiyalarımı tam itirməyimə səbəb olub. Sadəcə, indi daha çox işləməliyəm ki, gücümü itirməyim.
- Sizin son oyunda 45 dəqiqə meydanda olmağınız hələ bütün oyunboyu mübarizə aparmağa hazır olmadığınıza işarədi?
- Əlbəttə. Az məşq etmişdim və bu üzdən belə az oynamalı oldum. Növbəti oyunda bir az da artıq oynaya biləcəm. Bir sözlə, gündən-günə artıracam.
- Ancaq sizə qol vurmaq və ukraynalıları daha bir neçə təhlükəli zərbəylə həyəcanlandırmaq imkanınız oldu...
- Mən özüm də hiss edirəm ki, hələ əvvəlki kimi çıxış edə bilmirəm. Düşünürəm ki, 2-3 oyuna hər şey qaydasına düşəcək.
- Sizin cinahınızda Ruslan Əmircanov da forma geydi. Hansı ki, öncə transferə çıxarılsa da, sonradan komandada saxlanıldı. Siz arxanızda onun və ya Rail Məlikovun çıxış etməsində hansısa fərq hiss edirsiz?
- Rail, təbii ki, əsas heyət oyunçusudu, Ruslan da pis futbolçu deyil. Hazırda bizim komandada elə ona çalışırlar ki, hər mövqedə iki eyni səviyyəli futbolçu olsun.
- “Arsenal” kimi komandalarla oyunlarda qələbə sizin üçün nə dərəcədə vacibdi?
- Birincisi, hər birimizə oyun təcrübəsi lazımdı. İkincisi, bu oyunlarda sən öz gücünü göstərə bilirsən. Ancaq nəticə o qədər də vacib əhəmiyyət daşımır. Düşünürəm ki, “Arsenal” bizim çempionatda oynasaydı, ilk altılığa düşə bilərdi. Bizə belə oyunlar lazımdı. Hətta daha güclü rəqiblərlə oynamalıyıq. Bundan biz ancaq fayda götürə bilərik.
- Bəs “Neftçi” özü bu gün idealdan çoxmu uzaqdı?
- İndiki durumda nəsə söyləmək olmaz. Hər şeyi təlim-məşq toplanışımızın sonu və çempionatdakı ilk oyunumuz göstərəcək.
- “Mardan” İdman Kompleksi darıxdırıcı deyil ki?
- Bu, bizim işimizdi, gəlmişik ki, hazırlaşaq. Çox futbolçu belə toplanışları sevmir. Amma forma yığmaq, güclənmək və Premyer Liqanın oyunlarına yaxşı hazırlıq keçmək üçün bu toplanışlar çox vacibdi.
