28 yanvar 2011 14:07
“Neftçi`nin çoxlu üstünlükləri var”
"Neftçi"nin gənc futbolçusu Mirhüseyn Seyidov Antalya şəhərində keçirilən təlim-məşq toplanışının gedişi barədə fikirlərini açıqlayıb. Azerisport.az xəbər verir ki, yarımmüdafiəçi flaqmanın üstün cəhətlərini də açıqlayıb:
"Təlim-məşq toplanışında hər şey qaydasındadı. Hazırlıq çox yaxşı gedir. Sevindirici haldı ki, komandada zədəli futbolçu yoxdu. Buna görə də əhval-ruhiyyəmiz daha yüksəkdi. Burada artıq bir yoxlama matçına da çıxmışıq. Ukrayna "Arsenal"ı heç də zəif rəqib deyildi. Hazırlıq matçı olsa da, çox yaxşı oynadıq”.
“Neftçi”nin çoxlu üstünlükləri var. Yeni rəhbərliyin gəlişindən sonra komandada yeni mühit yaranıb. İndi flaqmanda birlik var. Təkcə məşqdə deyil, meydançadan kənarda da kollektivçilik, birlik nümayiş etdiririk. "Neftçi"də gənc oyunçular da var, təcrübəlilər də. Elə yaxşı mühit yaranıb ki, çox gənc olmağımıza rəğmən, bizdən böyüklər sıxılmağımıza imkan vermirlər. Bir sözlə, hər şey əladı" – deyə gənc futbolçu komandasındakı mühitdən razılığını dilə gətirib.
Seyidov bildirib ki, "ağ-qaralar" çempion olmağa da qadirdı: "Birinci dövrəyə də belə həvəslə hazırlaşmışdıq. Nəticədə qış fasiləsinə ilk pillədə yollandıq. İndi məsuliyyətimiz ikiqat artıb. Çünki çempionatın davamında zirvədəki yerimizi qoruyub, qızıl medallara qovuşmalıyıq. Sağ olsunlar azarkeşlər, Premyer Liqanın ilk hissəsində bizə böyük dəstək göstərdilər. Onlara səslənib demək istəyirəm ki, "altılıq" oyunlarında da "Neftçi"yə dəstəklərini davam etdirsinlər və çempionluğu birgə bayram edək".
