28 yanvar 2011 00:18
Toni Adams: Hər mövqedə problemlərimiz var
“Qəbələ” dünən Türkiyənin Antalya şəhərindəki təlim-məşq toplanışı çərçivəsində növbəti sınaq matçında yeni ildəki ilk qələbəsinə sevindi. Lakin görüşdən sonra azerisport.az saytına açıqlama verən Toni Adams heç də rəqibdən güclü olduqlarını iddia etmirdi.
Bunun səbəbi isə çox sadə idi: çünki Cənubi Koreya çempionatının 6-cısı olan rəqib komandamıza qarşı ikinci heyəti ilə mübarizə aparırdı: “Çox ciddi rəqiblə qarşı-qarşıya gəldik. Onlar dörd gün öncə toplanışa başlasalar da, layiqli oyun sərgilədilər. Qələbə qazanmağımıza baxmayaraq, düşünürəm ki, rəqib bizdən daha güclü idi” – deyə Adams vurğulayıb.
Britaniyalı mütəxəssis hələ komandasında baxışda olan yeni afrikalı futbolçular barədə qərar verməyib: “Onlar hələ baxışdadılar. Düzdü, xoş təsir bağışlayırlar. Cəlddirlər, istedadlı olduqları hiss olunur. Ancaq mənə onları yenə iş başında görmək lazımdı. Bazar ertəsi daha bir sınaq matçımız var. Ondan sonra yeni gələnlərin taleyi ilə bağlı qərarımı açıqlayacaç”.
London “Arsenal”ının əfsanəsi komandasının hazırda mövcud olan çatışmazlıqlarından danışmaq istəmədi. Bunları komandasına qarşı hörmətsizlik kimi qələmə verən mütəxəssis yalnız aşağıdakıları söyləməklə kifayətləndi: “Mən komandama, futbolçularıma qarşı hörmətsizlik edə bilmərəm. Kollektivdəki çatışmazlıqlardan danışmağım düz çıxmazdı. Sadəcə onu deyə bilərəm ki, bizim hər mövqedə problemlərimiz var”.
