28 yanvar 2011 23:32
Avstriyalılarla oyuna itkisiz hazırlıq (FOTOLAR)
Türkiyənin Antalya şəhərində təlim-məşq toplanışı keçən "Neftçi" bu gün iki dəfə məşq edib. Azerisport.az xəbər verir ki, səhər məşqlərində futbolçular əsasən fiziki təmrinləri yerinə yetiriblər.
Axşam məşqi isə toplu çalışmalardan ibarət olub. Günorta saatlarında Antalyada başlanan yağış flaqmanın məşqi zamanı da davam edib. Məşqin sonlarına doğru yağış güclənsə də, bu, hazırlığa mənfi təsir göstərməyib.
Baş məşqçi Arif Əsədov "Neftçi"nin saytına açıqlamasında hər şeyin qaydasında olduğunu bildirib: "Dünən günortadan sonra futbolçular istirahət etdiklərinə görə, bugünkü ilk məşqdə fiziki yüklənmə oldu. Komandada hər şey yaxşıdı. Yalnız Emil Mpenzanın yüngül zədəsi var. Daha doğrusu, onun dizindəki köhnə zədəsi tam sağalmayıb. Fiziki yüklənmə olduqda, ağrılar verir. Digər futbolçuların səhhəti normaldı. Sabah səhər də məşq edəcəyik və bundan sonra növbəti yoxlama matçını keçirmək üçün Belekə yollanacağıq".
Qeyd edək ki, "ağ-qaralar" sabah Bakı vaxtı ilə saat 20:00-da Avstriyanın Qrats şəhərini təmsil edən "Şturm"la qarşılaşacaqlar.
