30 yanvar 2011 18:11
Bayern`in futbolçuları meydanda yumruq davasına çıxdı (FOTO)
Almaniya Bundesliqasının son turu çərçivəsində keçirilən “Werder” – “Bayern” görüşündə qonaqlar qələbə qazansa da (1:3), Münhen klubunun iki futbolçusunun meydanda yumruq davasına çıxması azarkeşləri üzüntüyə qərq edib. Azerisport.az xəbər verir ki, komandanın hollandiyalı legioneri Aryen Roben və Almaniya millisinin gənc ulduzu Tomas Müller matçın gedişində dalaşıb.
Lakin hollandiyalı oyunçunun gənc komanda yoldaşına yumruq atmasından sonra başlayan bu davanın əsas səbəbi hələ də qaranlıq qalır. Qeyd edək ki, onlar arasındakı davanın daha da böyüməsinə həm öz oyundaşları, həm də rəqib komandanın üzvləri imkan verməyib. Matçdan sonra açıqlama verən Roben Mülleri hörmətsizlikdə ittiham edib: “Biz bir komandayıq. Hər kəs bir-birinə hörmət qoymalıdı. Bu tip şeylərdən nifrət edirəm”.
Komandanın kapitanı Filip Lam bu problemin komanda içində danışılıb yola qoyulacağını bildirərkən, klub rəhbərliyinin oyunçulara hansı cəzanı verəcəyi maraqla gözlənilir.
