31 yanvar 2011 01:13
“XL-la oyuna 100 faiz köklənməliyik”
"Neftçi"nin yarımmüdafiəçisi Rəşad Abdullayev komandasının Antalyada keçirilən təlim-məşq toplanışını dəyərləndirib. Azerisport.az xəbər verir ki, təcrübəli futbolçu hər şeyin qaydasında olduğunu bildirib:
"İlk təlim-məşq toplanışından fərqli olaraq, ikinci hazırlıq mərhələsində əsasən oyunlarda qüvvəmizi sınayırıq. Çoxlu toplu çalışmalar edirik. Məqsədimiz çempionatın qalan hissəsinə tam hazır olmaqdı. Zədəm yavaş-yavaş sağalır. Yüngül zədələnsəm də, bir az vaxt itirdim. Hazırda formaya düşməyim üçün fiziki güc yığıram”.
Rəşad sınaq matçlarındakı çıxışlarını isə belə dəyərləndirib: “Çox yaxşı haldı ki, keçirdiyimiz hər iki yoxlama matçında qalib gəlmişik. Ukrayna "Arsenal"ı ilə müqayisədə, "Şturm" adlı-sanlı rəqib idi. Buna baxmayaraq, istədiyimiz futbolu oynadıq, iki erkən qol vurub, inamlı qələbə qazandıq. İkinci oyunda hiss etdim ki, tam oynaya bilərəm. Yoxlama görüşlərində nəticə əsas deyil. Ən vacibi odu ki, belə qarşılaşmalarda səhvləri görüb, onların üzərində işləyəsən”.
Abdullayev, komandanın kapitanı olan və onunla eyni cinahda top qovan Rail Məlikovun yoxluğuna da münasibət bildirib: “Mənimlə eyni cinahda çıxış edən Rail son iki yoxlama matçında iştirak etməyib. Təbii ki, belə təcrübəli müdafiəçinin, kapitanının olmaması hiss olunur. Ancaq onu əvəzləyən Ruslan Əmircanov pis təsir bağışlamır. Onunla da oyunumuz yaxşı alınır. Oyunu konkret hansısa futbolçunun üzərində qurmaq istəmirik. Çünki çempionatın gedişində həmin oyunçu zədələnə və ya cəzalandırıla bilər. Elə etməliyik ki, komandada kiminsə yoxluğu hiss olunmasın. Bu dəfəki təlim-məşq toplanışında daha çox cavan oyunçu iştirak edir. Biz də təcrübəli futbolçu kimi onlara əlimizdən gələn köməyi əsirgəmirik".
Yarımmüdafiəçi onu da vurğulayıb ki, qış fasiləsindən sonra Premyer Liqaya qələbə ilə başlamaq vacibdi: "Xəzər Lənkəran"la oyun çox əhəmiyyətli qarşılaşmadı. Hamımız bu oyuna 100 faiz köklənməliyik. Qalib gələcəyimiz təqdirdə, irəliyə doğru böyük addım atarıq. Həm xal ehtiyatımızı artırarıq, həm də "altılığ"a rahat yollanarıq. Düzdür, qarşıda bizi uzun marafon - "altılıq" oyunları gözləyir. Ancaq hesab edirəm ki, "Xəzər Lənkəran" üzərində qələbə bizə çempionluq yolunda təkan verəcək".
