31 yanvar 2011 15:46
Turan Gürcüstan sərhəddində polis zorakılığına məruz qaldı
Türkiyə hazırlıqlarını başa vuran “Turan” dünən gecə saatlarında vətənə dönüb. Lakin azerisport.az xəbər verir ki, qardaş ölkədə keçirdiyi son sınaq matçında Cənubi Koreya klubu ilə görüşdən qalmaqalla ayrılan Tovuz klubu bu dəfə də gömrük postunda gürcü sərhədçilər tərəfindən heç bir ciddi səbəb olmadan problemlərlə üzləşib.
Belə ki, gürcü sərhədçilər avtobusla bağlı problem olduğunu bildiriblər. Bunun nəticəsi kimi komanda 4 saata yaxın gömrük postunda saxlanılıb. Səbəb kimi isə Batumidə yük yerinə vurulmuş möhürlərdən birinin zədələnməsi göstərilib.
Tovuz klubunun bununla bağlı bəyanatında bildirilir: "Çox həssas materialdan ibarət, ən adi şəraitdə belə zədələnə biləcək olan kağız parçasının çətin hava şəraitində zədələnməməsi mümkün deyildi. Lakin bütün bu məsələlərlə bağlı geniş informasiya tərkibli bildirişlərimizə və vəziyyəti izah etmək cəhdlərimizə baxmayaraq gömrük əməkdaşları klubu böyük məbləğdə cərimələməkdən çəkinmədilər. Bu azmış kimi əməkdaşlarımızla olduqca sərt və vəzifə həddini aşan formada davrandılar. Hətta komandamızın rəisi İman Həsənov və klub avtobusunun sürücüsü Gündüz Qasımovu həbs etməyə cəhd göstərdilər.
Məsələ ilə bağlı qonşu dövlətin aidiyatı orqanlarına müraciətlərimizə baxmayaraq sıralarında 4 gürcü futbolçunun olduğu “Turan” PFK-yla terorist qruplaşma kimi davranmalarına izah tapılmadı. Yalnız böyük məbləğdə cərimələndikdən sonra komanda gömrük postundan buraxıldı. Bütün bunları nəzərə alaraq məsələ ilə bağlı lazımi tədbirlərin görülməsi üçün yerində toplanan bütün faktlar əsasında məsələyə düzgün hüquqi qiymətin verilməsi üçün əlimizdən gələni edəcəyik”.
