31 yanvar 2011 16:04
Nasimov: XL-a qapıçımız da qol vursa, olar, təki qalib gələk
Azerisport.az sizi "Neftçi"nin özbəkistanlı hücumçusu Bahodir Nasimovun müsahibəsi ilə tanış edir.
- Bir müddət öncə Özbəkistan yığmasının heyətində zədə almışdın. Hazırda özünü necə hiss edirsən?
- Zədədən sonra mənə bir az çətin oldu. İndi yavaş-yavaş özümə gəlirəm, fiziki formamı bərpa edirəm. Oyunlara hazırlaşıram. Özümü 70-80 faiz hazır hiss edirəm.
- "Neftçi" Antalyadakı ikinci təlim-məşq toplanışında iki yoxlma matçı keçirib. Bu oyunlar haqqında nə deyə bilərsən?
- Mər hər iki qarşılaşmada forma geydim. Düzdü, axıra qədər mübarizə aparmadım. Buna hələlik fiziki formam imkan vermir. Sevindirici haldı ki, hər iki görüşü qələbə ilə başa vurduq. Məşqlərdə, oyunlarda var gücümüzlə işləyirik. Komanda şəklində çalışırıq ki, çempionata tam hazır olaq.
- Flaqman Ukrayna "Arsenal"ını 2:1 hesabı ilə məğlub etdiyi halda, daha güclü "Şturm"a 2 top fərqilə qalib gəldi. Avropanın adlı-sanlı komandalarından biri ilə görüş necə təsir bağışladı?
- "Şturm"la görüşümüz də çətin keçdi. Erkən qollar vurub, inamlı qələbə qazandıq. "Arsenal" da güclü komanda idi. Oyundan-oyuna "artırmaq" istəyirik ki, Premyer Liqada bizə çətin olmasın.
- 2 oyunda 3 qol vurmusan. Demək olarmı ki, əsl Bahodir qayıdıb?
- Bu təlim-məşq toplanışı hələ hər şey demək deyil. İnşallah, Premyer Liqada qollarımın davamının gəlməsini arzulayıram. Əsas odu ki, komandamız çempionatda fərqlənib, xal ehtiyatını artırsın və qızıl medallara yiyələnsin.
- Premyer Liqanın cari mövsümündə 15 qol vurmusan. Qış fasiləsindən sonra neçə dəfə fərqlənə biləcəyini düşünürsən?
- Şübhəsiz ki, çempionatın bombardiri olmaq istəyirəm. Ancaq mövsümün sonunadək neçə qol vuracağımı dəqiq deyə bilmərəm. Bizim əsas məqsədimiz "Neftçi"nin çempion olmasıdı.
- "Şturm"la görüşün ikinci hissəsində hücumda Emil Mpenza ilə birgə oynayırdın. Necə fikirləşirsən, sizin tandeminiz alınır?
- Təkcə təlim-məşq toplanışında deyil, həm də çempionat matçlarında Emillə duet şəklində oynamışıq. Mənə elə gəlir ki, bizdə tandem alınır.
- Bir çox vacib oyunlarda fərqlənmisən. Lakin bütün "Neftçi"sevərlər "Xəzər Lənkəran"ın qapısına yol tapmağını səbirsizliklə gözləyirlər. Bu dəfə onları sevindirə biləcəksənmi?
- Bu qarşılaşmaya ciddi hazırlaşırıq. Fevralın 13-də vacib oyuna çıxacağıq. Çalışacağam ki, qol vurub, komandamın qələbəsində pay sahibi olum. Fərqi yoxdur rəqibi "Neftçi"nin hansı oyunçusu məyus edəcək. "Xəzər Lənkəran"a lap qapıçımız da qol vursa, olar. Təki bu matçda qalib gələk!
Mənbə: “Neftçi”nin rəsmi saytı.
