31 yanvar 2011 16:42
Qazaxlar Beranekin qarşısına Azərbaycanı qabaqlamaq vəzifəsini qoydu
Xəbər verdiyimiz kimi, bu gün AÇ-2012-nin seçmə mərhələsi çərçivəsində Qazaxıstan yığmasının yeni baş məşqçisi təyin olundu. Azerisport.az xəbər verir ki, təqdimat mərasimində çıxış edən Qazaxıstan Futbol Federasiyasının baş katibi Sayan Hamitcanov və Beranek iddialı açıqlamalar veriblər.
QFF-nin baş katibi bildirib ki, yeni baş məşqçinin qarşısına qruplarında Azərbaycanı qabaqlamaq və 5-ci yeri tutmaq vəzifəsi qoyulub: “Biz bir çox mütəxəssislərlə danışıqlar apardıq. Lakin onların əksəri uzun müddətli müqavilə bağlanmasını istəyirdilər. Hətta növbəti tsikldə də komandanın sükanı arxasında qalmasını indidən tələb edənlər də var idi. Yalnız cənab Beranek qrup mərhələsini Azərbaycandan yüksəkdə başa vurmaqdan qorxmadı. Hər halda ilin sonunda çexiyalı mütəxəssisin buna nail olub olmayacağını biləcəyik”.
Beranek isə təqdimat mərasimində bunları dilə gətirib: “Mən istəyirəm ki, Qazaxıstan yıması “Barcelona” kimi oyun sərgiləsin, amma mən axmaq deyiləm. Baxmayaraq ki, Madrid “Real”ı kimi sürətli, top saxlamağı bacaran, əla hücum futbolu sərgiləməyi bacaracağımıza da ümid edirəm. Qazaxıstan dünyada siyasi, iqtisadi və idman sahəsindəki inkişafı ilə məşhurdu. Mən də futbol yığmasının nəticələrini yaxşılaşdırmaq istəyirəm”.
Qeyd edək ki, Qazaxıstan yığması ilə Azərbaycan arasındakı ilk oyun iyunun 3-də Qazaxıstanda, təkrar qarşılaşma isə sentyabrın 6-da Bakıda keçiriləcək.
