31 yanvar 2011 00:08
Xəzər Lənkəran bu gün qayıdır, Rednik isə yox
Türkiyənin Antalya şəhərində təlim-məşq toplanışında olan “Xəzər Lənkəran” qardaş ölkədəki hazırlıq prosesini yekunlaşdırıb. Azerisport.az xəbər verir ki, 20 gündü ki, Antalyada hazırlıq keçən “ağ-yaşıllar” bu gün səhər saatlarında Antalyanı tərk edərək, vətənə qayıdacaq.
Maraq üçün bildirək ki, yerli futbolçulardan fərqli olaraq, legionerlər Bakıya yox, birbaşa vətənlərinə yollanacaqlar. Elə baş məşqçi Mirça Rednik də komandanın düşərgəsindən ayrılaraq, Rumıniyaya gedib. Onun səfərində məqsəd həm ailəsinə baş çəkmək, həm də bəzi transfer məsələlərini yoluna qoymaqdı.
Lənkəran klubu bir də fevralın 3-də Bakıda bir araya gələcək. Bir gün sonra isə komanda Lənkərana yollanaraq, "Neftçi" ilə oyunun hazırlıqlarına start verəcək.
Maraq üçün qeyd edək ki, “Xəzər Lənkəran” 20 günlük toplanış çərçivəsində bir çox oyunçuları sınaqdan keçirməklə yanaşı, həm də 6 sınaq matçında qüvvəsini sınadı. “Atırau”ya (Qazaxıstan) 1:2, “Kasımpaşa”ya (Türkiyə) 1:4, “Zarya”ya (Ukrayna) 1:3 uduzan Mirça Rednikin yetirmələri son oyunda da “Chernomorets”ə (Odessa, Ukrayna) 2:3 hesabıyla məğlub oldu. Təmsilçimizin Ukrayna “Metallurq”u (Zaporojye) ilə görüşdə 1:1 hesablı heç-heçə qeydə alınmışdısa, “Krivbass”a (Ukrayna) da 1:0 hesabıyla qalib gəldiyi vaxt, matçın 75-ci dəqiqəsində güclü yağış səbəbindən oyunun davam etdirilməməsi qərara alınmışdı.
