1 fevral 2011 15:49
Zaur Məmmədov: İnter`dən aldığımız oyunçular onlara qarşı oynamayacaq
Zaqatalanın “Simurq” klubunun prezidenti Zaur Məmmədov azerisport.az saytına müsahibəsində komandasının hazırlıqlarından və planlarından danışıb.
- Hazırlıqlarınız necə keçir?
- Yaxşı. Hər şey Qyoko Haciyevskinin planı üzrə davam edir. Hazırda “Şəfa” stadionunda gündə iki dəfə məşqlər keçirik.
- Komanda Gürcüstana getməli deyildimi?
- Bəzi səbəblərə görə gedə bilmədik. Məsələ burasındadı ki, komandanın komplektləşdirilməsi hələ başa çatmamışdı. Ancaq biz yenə gedə bilərik. Artıq “Dinamo” və “Sioni” ilə yoxlama matçları da dəqiqləşdirilib. Sabah “Bakılı” ilə yoxlama matçımız var, ondan sonrakı planımızı da məşqçimizin istəyinə əsasən tərtib edəcəyik.
- Kimlərin keçidini həll etmisiz?
- Fərid Quliyev, Emin Quliyev, Samir Musayev və Ramin Nəsibovu artıq komandamıza götürmüşük. Həmçinin “İnter”in üç hücumçusunu icarəyə götürmüşük. Bunlar Mario Souza, Camal Məmmədov və Tofiq Mikayılovdu. Onların hamısıyla yarım illik müqavilələr bağlamışıq. Həmçinin “Bakı”nın müdafiəçisi Səbuhi Həsənov da icarə əsasında komandamızda çıxış edəcək.
- Onlar “İnter”ə qarşı oynayacaq? Yenə bu komandanın oyunçularıyla problem yaranmayacaq?
- Onlar “İnter”ə qarşı dəqiq oynamayacaq. Düzdü, bu, müqavilədə göstərilməyib. Ancaq Georgi Nikolovla bunu danışmışıq. Belə bir centlmensayağı razılığımız var.
- Çoxları belə hesab edir ki, Emin Quliyev və Samir Musayev kimi oyunçuların artıq vaxtı keçib...
- Futbolçular var ki, 20-dən sonra açılır, bəziləri də var ki, 30 yaşdan sonra. Biz onlardan çox şey gözləyirik.
- Yeri gəlmişkən, “Simurq” niyə məhz icarəyə götürməyə üstünlük verir?
- Bilirsiz ki, arıq mövsümün ilk dövrəsi arxada qalıb. Biz əsasən yerli futbolçulara üstünlük veririk. İndiki vəziyyətdə isə bizə təcrübəli oyunçuların köməyi lazımdı.
- Yenə də kimlərisə almaq fikriniz var?
- Mövsümün əvvəlində biz “Neftçi”dən 18 yaşlı Elvin Yunusovu icarəyə götürmüşdük. Onda böyük potensial olduğunu düşünürük və yəqin ki, mövsümün sonunda bu futbolçunun transfer hüquqlarını da alacağıq. Bir mərkəz müdafiəçisinə ehtiyacımız var. Haciyevskini Rasim Ramaldanovun zədəli olması bərk narahat edir. Əlimizə elə birisi düşsə, ala bilərik.
- Əsas rəqibiniz “Turan” qarşısına Premyer Liqanı 7-ci pillədə başa vurmaq tələbini qoyub...
- Açıq danışıram, başlıcası yerimizi qorumaqdı. Komandanın baş məşqçisi Haciyevskidi və o da komandanı mümkün qədər yuxarı pillələrə qaldırmaq istəyir. 7-ci yeri tutmaq artıq daha çox makedoniyalı mütəxəssisin imicini qoruyub saxlamaq baxımından arzusu ola bilər.
