1 fevral 2011 11:43
Sadıq Sadıqov: Antalyaya gəlişim futbolçularla müqavilələri rəsmiləşdirməklə bağlıdı
“Neftçi”nin prezidenti Sadıq Sadıqov Fransanın “Lyon” klubunun yetirməsi olan əlcəzairli Yasin Himanın keçidinə münasibətini açıqlayıb. Azersiport.az xəbər verir ki, paytaxt klubunun başçısı 26 yaşlı futbolçuyla bağlı bunları dilə gətirib:
“Son bir ildə komandamıza cəlb olunan futbolçular “Neftçi”nin seleksiyaçı-məşqçiləri tərəfindən izlənilir. Yəni, klubumuza demək olar ki, baxışa futbolçu gəlmir. Bildiyiniz kimi, Yasin Hima “Neftçi”nin Antalyada keçirdiyi birinci təlim-məşq toplanışı zamanı mənim tapşırığıma əsasən, danışıqlar aparmaq üçün komandanın düşərgəsində olmuşdu. Danışıqlar müsbət nəticələndiyi üçün o, “OİK Energiya”ya qarşı yoxlama matçında da forma geyinmişdi. Keçmiş klubu ilə məsələləri yoluna qoymaq və şəxsi işləri ilə əlaqədar evə dönən futbolçu dünən Antalyaya qayıdıb. Mənim Antalyaya gəlişim futbolçularla müqavilələri rəsmiləşdirməklə bağlıdı. Artıq Yasin Hima “Neftçi” PFK-nın oyunçusudu. Yaxın günlərdə isə daha bir legionerlə müqavilə bağlayacağıq”.
