Neftçi Bosniya klubunu da məğlub etdi (YENİLƏNİB)

Türkiyənin Antalya şəhərində təlim-məşq toplanışında olan Premyer Liqamızın lideri “Neftçi” bu gün qardaş ölkədə növbəti sınaq matçına çıxıb. Azerisport.az xəbər verir ki, paytaxt klubunun bu dəfəki rəqibinin öncə Çernoqoriya çempionu “Rudar” olacağı bildirilsə də, son anda rəqib dəyişdirilib.

 

Nəticədə flaqman əvvəldən xəbər verildiyi kimi, "Rudar"la yox, Bosniya və Hersoqovinanın "Çelik Zenica" komandası ilə qarşılaşıb. "Neftçi"nin Çernoqoriya çempionu ilə oyunu isə fevralın 3-də baş tutacaq.

 

Qeyd edək ki, bu, Arif Əsədovun komandası Antalyadakı ilk hazırlıq prosesi dövründə Rusiyanın "SKA-Energiya" klubu ilə qarşılaşmış və oyun 1:1 hesabı ilə başa çatmışdı. Bu dəfəki toplanış dövründə isə Ukraynanın “Arsenal” klubuyla qarşılaşmada 2:1, Avstriya “Şturm Graz”ı ilə görüşdə isə 2:0 hesablı qələbə qazanılıb.

 

Yoldaşlıq oyunu

1 fevral

 

19:00. NEFTÇİ – ÇELİK ZENİCA - 1:0 (0:0)

 

Artıq flaqmanın bu komandayla oyun üçün start heyəti də məlumdu: Elçin Sadıqov, Denis Silva, İqor Mitreski, Ruslan Əmircanov, Tərlan Quliyev, Yasin Hima, Slavço Georgievski, Rəşad Abdullayev, Cavid İmamverdiyev, Araz Abdullayev, Bahodir Nasimov.

 

"Çelik Zenica"nın start heyəti: Luka Bilobrk, Semyon Miloşeviç, Elvis Sadikoviç, Mehmedaliya Çoviç, Zoran Brkoviç, Eldin Adiloviç, Aldin Şişiç, Armin Kapetan, Eldar Hasanoviç, Adin Jafiç, Dario Puriç.

 

Qeyd edək ki, qapını Elçin Sadıqovun qorumasına Rauf Mehdiyevin yüngül zədəsinin olması səbəb olub

 

Oyun başladı

Qarşılaşmanın əvvəlləri "Neftçi"nin ərazi üstünlüyü şəraitində keçir

Görüşü "Neftçi" PFK-nın prezidenti Sadıq Sadıqov da izləyir

Oyun əsasən meydanın mərkəzində gedir. Real qol epizodu yoxdu

32-ci dəqiqədə Bahodir Nasimov Araz Abdullayevdən ötürmə alıb, qapıya zərbə vurur. Təhlükəli zərbə müdafiəçiyə dəyir

"Neftçi" oyuna daha çox nəzarət etsə də, bunu hesabda əks etdirə bilmir

İlk hissə başa çatdı

 

İkinci hissə başladı

Fasilədən sonra "Neftçi"nin heyətində dəyişikliklər edilib. Meydanı tərk edən Georgievski, Rəşad və Arazın əvəzində Ruslan Qurbanov, Mirhüseyn Seyidov və Flavinyo mübarizə aparacaqlar

48-ci dəqiqədə futbolçular bir-birlərinə qarşı kobud oynadılar. Hakim Mirhüseyn Seyidovla Zoran Brkoviçə qırmızı vərəqə göstərdi

Lakin qarşılıqlı razılığa əsasən, oyun yenə 22 futbolçu ilə davam edir. "Neftçi"dən Elmar Baxşiyev meydana çıxır

52-ci dəqiqədə "Neftçi" hesabı açmağa çox yaxın oldu. Lakin Ruslan Qurbanovun sağ cinahdan ötürməsindən sonra Bahodir Nasimovun başla vurduğu top qapı dirəyinə tuş gəlir

57-ci dəqiqədə Cavid İmamverdiyevin ötürməsindən sonra topa başla zərbə endirən Denis Silva hesabı açmağa yaxın olur

Qol! "Neftçi" 65-ci dəqiqədə hesabı açır. Flavinyonun ötürməsindən sonra Nasimov fərqlənir - 1:0

66-cı dəqiqədə İqor Mitreskini Tural Nərimanov əvəzləyir

75-ci dəqiqədə Cavid İmamverdiyevin qüvvətli zərbəsindən sonra top tirin azca üstündən keçir

77-ci dəqiqədə Yasin Hima ilə Cavid İmamverdiyevin əvəzinə meydana Kərim Diniyevlə Eltun Yaqublu çıxır

82-ci dəqiqədə baş məşqçi Arif Əsədov daha bir gənc futbolçunu meydana buraxır. Malik Babayev Bahodir Nasimovu əvəzləyir

86-cı dəqiqədə Elmir Kuduzoviçin birbaşa qapıya göndərdiyi cərimə zərbəsi təhlükəli alınır 

Oyun 1:0 hesabı ilə "Neftçi"nin xeyrinə başa çatır