2 fevral 2011 12:04
Naci Şensoy: Onlar Turan`ın oyunlarını heç vaxt idarə etməyəcəklər
Tovuzun “Turan” klubunun türkiyəli baş məşqçisi Naci Şensoyun azerisport.az saytına müsahibəsi.
- Komandanın Türkiyədəki hazırlıq prosesindən razı qaldınızmı?
- “Turan” Türkiyədə çox yaxşı təlim-məşq toplanışı keçirdi. Ancaq bunun nə dərəcədə səmərəli keçdiyini mövsümün gedişi, qazanacağımız nəticələr göstərəcək. Komanda bir neçə yoxlama matçında da qüvvəsini sınadı, hansı ki, bu görüşlərdə meydana çıxan gənc futbolçularımız böyük potensiala malik olduqlarını isbatladılar. Biz həmçinin yeni futbolçularla da müqavilə imzaladıq. Bolqar Boris Kondev qarşıdakı 6 ayda “Turan”da oynayacaq. Martin Kerçev daha çox – 1 il bizimlə birgə olacaq.
- Bununla da transfer çalışmalarınız bitir?
- Bəli. Hazırda mən Türkiyədəyəm. Fevralın 2-də Azərbaycana gələcəyəm. Bir gün sonra isə çempionat oyunlarına hazırlıqlarımızı bərpa edəcəyik.
- Cənubi Koreyanın “Gyeongnam” klubuyla yoxlama matçında nə baş vermişdi?
- Onların nəsə problemləri vardı. Onlar öncədən heç oynamaq istəmirdi. Onlar bizə qarşı çox hörmətsizlik etdilər. Oyunu idarə edən hakimlər də etiraf etdilər ki, öz həmyerlilərinə kömək edirlər. Bu ki, sadəcə yoxlama matçı idi, niyə onlar belə edirdilər, baş açmadım.
- Siz bilirsiz ki, AFFA-nın Hakimlər Komitəsi bu ölkənin hakimlərini Azərbaycan Premyer Liqasının oyunlarını idarə etməyə çağırır?
- Mənə bu haqda danışıblar. Federasiyaya qarşı mən heç bir söz deyə bilməyəcəm. Amma “Turan”ın yoxlama matçlarında onlar bir daha idarəçilik etməyəcəklər.
- Siz onlarla danışdınız?
- Bəli. Oyun başlayandan yarım saat sonraya kimi hər şey normal idi. Amma ondan sonra hər şey dəyişdi. Hələ baş məşqçini demirəm. O da oyunun gedişində zibil qabını bizim məşqçi Eldəniz Hüseynovun üstünə vurdu. Daha sonra onlar hakimlərə yanaşdılar, nə dedilərsə, oyunu davam etdirmək istəmədilər. Biz 20 dəqiqəyə yaxın gözləsək də, onlar qərarlarını dəyişmədilər.
- Daha bundan sonra sözügedən ölkənin klublarıyla oyun keçirməyəcsiz?
- Bəli. Futbol planında bu ölkə bizim üçün tam yadlaşdı.
- İndi siz Azərbaycan və Koreya hakimləri arasındakı fərqləri görə bildiniz?
- Mən bilmirəm sizin hakimlər geridə qalan 5 il ərzində nə dərəcədə dəyişiblər. Çünki mən Azərbaycanda deyildim. Sizin bu sualınıza çempionatın bir neçə turundan sonra cavab verə bilərəm.
- “Turan”dan çempionatda nə gözləyək?
- Biz hər oyuna qələbə üçün çıxacağıq. Yaxşı hazırlıq prosesi keçirmişik. İndi bunu öz oyunlarımızda əks etdirməliyik. Dəyişiklikləri siz özünüz də görəcəksiz.
