Neftçi Antalya toplanışını məğlubiyyətsiz bitirdi (YENİLƏNİB)

Türkiyənin Antalya şəhərində təlim-məşq toplanışında olan “Neftçi” bu gün qardaş ölkədəki sonuncu sınaq matçına çıxıb. Azerisport.az xəbər verir ki, Arif Əsədovun çalışdırdığı paytaxt komandası 4-cü, sonuncu yoxlama görüşünü Çernoqoriya çempionu “Rudar”a qarşı keçirib.

 

Qeyd edək ki, əslində “ağ-qaralar” bu rəqibiylə hələ bir neçə gün öncə görüşməliydi. Lakin həmin gün qarşılıqlı olaraq planlarda dəyişiklik edildiyindən, “Neftçi” Bosniya və Hersoqovina təmsilçisi “Çelik”lə qarşılaşmışdı.

 

Qeyd edək ki, yanvarın 24-dən etibarən Antalyada təlim-məşq toplanışında olan flaqman bu oyuna kimi artıq 3 yoxlama matçında qüvvəsini sınamışdı. "Ağ-qaralar" "Arsenal"a (Kiyev, Ukrayna) 2:1, "Şturm"a (Qrats, Avstriya) 2:0, "Çelik"ə (Zenitsa, Bosniya və Hersoqovina) isə 1:0 hesabı ilə qalib gəlmişdi. Antalyadakı ilk toplanış dövründə isə Rusiya “SKA Energiya”sı ilə görüş 1:1 hesabıyla başa çatmışdı. Bu günkü oyunla "ağ-qaralar" Antalyadakı sınaq matçlarına yekun vurmuş oldu.

 

Yoxlama oyunu

3 fevral

 

19:15. NEFTÇİ - RUDAR - 2:1 (1:0)

 

"Neftçi"nin start heyəti: Rauf Mehdiyev, Ruslan Əmircanov, Denis Silva, İqor Mitreski, Tərlan Quliyev, Slavço Georgievski, Mirhüseyn Seyidov, Rəşad Abdullayev, Cavid İmamverdiyev, Flavinyo, Bahodir Nasimov.

"Rudar"ın start heyəti: Milan Miyatoviç, Stefan Lutovaç, Bojan İvanoviç, Milivoye Mrdak, İvitsa Françiskoviç, Adziç Vladan, Duşan Miçiç, Predraq Brnoviç, Miroye Yovanoviç, İvitsa Yovanoviç, Veselin Boyiç.

 

Oyun başladı

5-ci dəqiqədə Rəşad Abdullayevin sağ cinahdan ötürdüyü topu Bahodir Nasimov başla qapıya vursa da, top az fərqlə çölə getdi

Oyun "Neftçi"nin üstünlüyü ilə keçir, amma hələ də qol axtarışları bəhrəsizdi

Görüşü "Neftçi" PFK-nın prezidenti Sadıq Sadıqov da izləyir

33-cü dəqiqədə İqor Mitreski arxa xəttdə səhbə yol verdi, rəqib futbolçu topu oğurlayıb, qapıya təhlükəli zərbə endirsə də, dəqiq oynamadı

35-ci dəqiqədə Nasimov real qol şansını qaçırır. Mirhüseyn Seyidovun ötürməsindən sonra təkbətək çıxan hücumçunun zərbəsi qapı dirəyinin bir neçə santimetrliyindən keçir

Qol! 45-ci dəqiqədə Mirhüseyn Seyidovdan topu qəbul edən Bahodir Nasimov yaxın məsafədən hesabı açır - 1:0

Fasilədə Mirhüseyn Seyidovla Rauf Mehdiyevi yeni futbolçular - Rodriqinyo ilə Vitali Kovalyov əvəzləyir

47-ci dəqiqədə Rəşad Abdullayev iti bucaq altında yaxın küncə güclü zərbə vurur - 2:0

62-ci dəqiqədə Boyan İvanoviçin uzaqdan zərbəsi ilk matçına çıxan Kovalyov üçün qarşısıalınmaz olur - 2:1

65-ci dəqiqədə Georgievski, Flavinyo və Rəşadın əvəzinə meydana Araz Abdullayev, Yasin Hima və Ruslan Qurbanov daxil olur

"Neftçi" rəqib qapısı qarşısında dalbadal iki təhlükəli vəziyyət yaradır, amma son anda Araz və Ruslanın zərbələri dəqiq olmur

79-cu dəqiqədə Elmar Baxşiyev Cavid İmamaverdiyevi əvəzləyir

84-cü dəqiqədə Denis Silvanın əvəzinə Tural Nərimanov meydana daxil olur

86-cı dəqiqədə Ruslan Əmircanov rəqibin təhlükəli hücumunu zərərsizləşdirir

Matç başa çatdı - 2:1