4 fevral 2011 10:32
Kamran Ağayev: Foqts necə desə, elə də olacaq
Azərbaycan yığma komandasının “Xəzər Lənkəran”da top qovan qapıçısı Kamran Ağayev azerisport.az saytına müsahibəsində komandamızın yeni ildəki ilk sınaq matçında Ukraynanın “Metallist” klubuna məğlubiyyətindən danışıb.
- Çıxış etmədiyiniz “Metallist”lə oyun haqda nə deyərdiniz?
- Mən oynamadığım oyunlar haqda danışmağı sevmirəm. Baxdığım qədərilə düşünürəm ki, komanda normal çıxış edirdi. Yaxşı oynasaq da, hesab oyuna görə olmadı.
- Məğlubiyyətə səbəb nə oldu?
- Biz xeyli oyunçunu sınaqdan keçirirdik. Həm də rəqib təsadüfi bir qol vurdu. Təəssüf ki, onlara cavab verə bilmədik. Adətən deyirlər ki, klublar yığmalardan güclü olur. Hər halda bu da başadüşüləndi. Çünki klublarda müxtəlif ölkələrdən olan çoxlu legionerlər çıxış edir.
- Yəqin ki, Macarıstanla oyunda siz meydanda olacaqsız...
- Hər şeyi baş məşqçi həll edir. Berti Foqts necə desə, elə də olacaq.
- Bu dəfəki oyun fərqli olacaqmı?
- “Metallist”ə qarşı oyuna daha çox məşq kimi yanaşırdıq. Ancaq Macarıstan tam fərqlidi. Axı bu oyunun nəticəsi FİFA-nın reytinqinə də təsir göstərəcək. Həm də AÇ-2012-nin seçmə mərhələsi çərçivəsində Belçikayla oyuna yaxşı hazırlaşmaq baxımından bu, vacib görüşdü.
- Dubaya birbaşa Antalya toplanışından getdiyiniz üçün yorğunluq hiss etmirsiz ki?
- Bu, bizim işimizdi və mən bunu sevirəm. Yorğunluq yoxdu, daha da yaxşı oynamaq istəyirəm.
- Martın 20-da Brüsseldə keçiriləcək seçmə oyundan nə gözləyək?
- Komandamız həmişə ən yaxşısını düşünüb. Marta kimi hələ vaxtımız var. Biz heç vaxt uduzmaq istəmirik.
